जंगली च्याउ खाएर आमाछोराको मृत्यु



सांकेतिक तस्बिर

धनकुटा । धनकुटामा जंगली च्याउ खाएर एक महिला र उनकी सात वर्षीय नाबालक छोराको मृत्यु भएको छ ।

सहिदभूमि गाउँपालिका–३ घर भई धनकुटा नगरपालिका–७ मा डेरा गरी बस्ने २८ वर्षीया मुना राई र उनका छोरा सचिनको धरानस्थित बिपी कोइराला स्वास्थ्य विज्ञान प्रतिष्ठानमा उपचारका क्रममा मृत्यु भएको हो ।

जिल्ला अस्पताल धनकुटामा उपचार हुन नसकी धरान रेफर गरिएका उनीहरूको उपचारका क्रममा बिहान ९:१५ बजे आमाको मृत्यु भएको प्रहरी कार्यालयका प्रहरी नायब उपरीक्षक नरेन्द्र कुँवरले जानकारी दिए ।

सिकिस्त रहेका उनका छोराको पनि आईसीयू कक्षमा उपचारका क्रममा बेलुका मृत्यु भएको छिमेकी भोगेन्द्र राईले बताए । प्रहरी सञ्चार शाखाका अनुसार मृतकले यही जेठ १५ गते धनकुटा–७ मा रहेको चुलिवन जंगलबाट च्याउ ल्याएर खाएका थिए ।

च्याउ खाएपछि बिरामी परेका उनीहरू जिल्ला अस्पताल धनकुटामा उपचारका लागि भर्ना भएका थिए ।

जिल्लामा उपचार हुन नसकेपछि १८ गते उनीहरूलाई थप उपचारका लागि बिपी कोइराला स्वास्थ्य विज्ञान प्रतिष्ठान धरान रेफर गरिएको थियो ।

उपचारमा संलग्न जिल्ला अस्पतालका डा. डुराण्डसिंह खड्काका अनुसार पखाला लाग्ने र वान्ता हुने समस्या लिएर बुबाआमा र छोरा अस्पताल आएका थिए । उपचारपछि बुबा ठीक भएर आमाछोराको स्याहारमा रहेका थिए भने आमाछोराको स्वास्थ्यमा सुधार भइरहेको थियो ।

अचानक शुक्रबार आमाको रक्तचाप कम भई बेहोसीको अवस्था आएको र छोराको मिर्गौलामा समस्या देखापरेको थियो । त्यसपछि भने थप उपचारका लागि धरान रेफर गरिएको डा. खड्काले जानकारी दिए ।


क्लिकमान्डु