नेपाल टेलिकमले छिट्टै ई-सिम प्रयोगमा ल्याउने, मोन्टी युके ग्लोबलसँग सम्झौता

काठमाडौं । नेपाल टेलिकमले केही समयभित्रै ई-सिम उपलब्ध गराउने भएको छ ।

टेलिकमले मोन्टी युके ग्लोबलसँग ई-सिम सेवा उपलब्ध गराउने विषय आवश्यक प्लेटफर्म उपलब्ध गराउने सम्झौता गरेको छ ।

यससम्बन्धी सम्झौता पत्रमा गत आइतबार नेपाल टेलिकमकी प्रमुख व्यावसायीक अधिकृत संगीता पहाडी र मोन्टी युके ग्लोबलको स्थानीय प्रतिनिधि अल्टिमेट होराइजन टेक्नोलोजिजका प्रमुख कार्यकारी अधिकृत आदित्य आनन्दका बीच सम्झौता सम्पन्न भएको थियो ।

सम्झौता अनुसार मोन्टी युके ग्लोबलले नेपाल टेलिकमका ग्राहकहरुलाई ई-सिम सेवा उपलब्ध गराउनका लागि आवश्यक प्लेटफर्म उपलब्ध गराउने छ ।

सो अवसरमा प्रमुख व्यावसायिक अधिकृत संगीता पहाडीले नेपाल टेलिकमले नयाँ नयाँ प्रविधि भित्र्याउने क्रममा ई–सिम समेत उपलब्ध गराउने भएको र यसका लागि आवश्यक कार्य छिट्टै नै प्रारम्भ हुने बताइन ।

अल्टिमेट होराइजन टेक्नोलोजिजका प्रमुख कार्यकारी अधिकृत आदित्य आनन्दले ई-सिमका लागि आवश्यक सम्पूर्ण प्राविधिक कार्य समयमै सम्पन्न गरी कम्पनीलाई उपलब्ध गराउने प्रतिबद्धता व्यक्त गरे ।

ई-सिम एक प्रकारको भर्चुअल अर्थात इलेक्ट्रोनिक सिम हो । ई-सिम उपलब्ध भएपछि अहिलेको जस्तो भौतिक रुपमा प्रयोग गरिने सिमकार्डको आवश्यकता पर्दैन ।

यसका लागि ई-सिम सपोर्ट गर्ने ह्यान्डसेट आवश्यक हुन्छ । यसबाट फोन गर्ने र डाटा चलाउने लगायतका विभिन्न कार्य गर्न सकिन्छ ।

ई-सिम प्रयोगमा आए पश्चात सिमकार्ड परिवर्तन गर्नुपर्ने आवश्यकता हुँदैन । मोबाइल सेटबाहेक ई-सिमलाई अन्य डिभाइस तथा स्मार्ट वाच र शरीरमा पहिरिन योग्य विभिन्न प्रकारका डिभाइसहरुमा समेत प्रयोग गर्न सकिन्छ ।

हालका सबै प्रयोगकर्ताले समेत ई-सिम प्रयोग गर्न सक्ने र नयाँ प्रयोगकर्ताले समेत सहज तरिकाले ई–सिम लिन सक्ने टेलिकमले जनाएको छ ।

ई-सिम सञ्चालन गर्न प्राविधिक तयारी शुरु भएको टेलिकम प्रवक्ता रञ्जित लोहनीले बताए ।

‘नेटवर्कमा ई-सिम सञ्चालन गर्न प्राविधिक तयारी शुरु भएको छ,’ लोहनीले भने, ‘प्राविधिक तयारी पूरा भएपछि ई-सिम सञ्चालनमा आउँछ ।’

अहिलेका सञ्चालनमा रहेका सबै मोबाइल फोनले ई-सिम सपोर्ट गर्दैनन् । आफ्नो मोबाइलको स्पेसिफिकेसन हेरेर ई-सिम सर्पोट गर्ने नगर्ने जानकारी लिन सकिन्छ ।