सिटिजन लाइफले साधारणसभा बाेलायाे, आइपीओ निष्कासनको प्रस्ताव पेश गरिँदै

काठमाडौं । सिटिजन लाइफ इन्स्योरेन्स कम्पनीले चौथो वार्षिक साधारण सभाको मिति तोकेको छ । इन्स्योरेन्सको फागुन १३ गते बसेको बैठकले सभाको मिति तय गरेको हो ।

चैत ११ गते भर्चुअल माध्यमबाट छाँयादेवी कम्प्लेक्समा दिउँसो ३ बजदेखि साधारणसभा सञ्चालन हुने कम्पनीले जानकारी दिएको छ । साधारणसभाले सर्वसाधारणका लागि आइपीओ निष्कासन गर्ने प्रस्ताव पारित गर्नेछ ।

कम्पनीले सभामा आर्थिक वर्ष २०७६/७७ मा संस्थागत सामाजिक उत्तरदायित्व अन्तर्गत कोरोना भाइरसको रोकथाम तथा प्रभावितहरुको उपचारका लागि नेपाल सरकारबाट स्थापित कोरोना कोषमा कम्पनीको तर्फबाट गरिएको आर्थिक सहायता वापतको ७ लाख ५० हजार रुपैयाँ अनुमोदनका लागि पेश गर्ने भएको छ ।

कम्पनीको नियमावलीको नियम २७, २९ र ३१ मा आवश्यक संशोधन गर्ने र सो संशोधनमा नियमनकारी निकायबाट कुनै सुझाव वा निर्देशन भएमा सोलाई समावेश गर्नको लागि सञ्चालक समितिलाई अख्तियारी दिने विशेष प्रस्ताव सभाले पारित गर्नेछ ।

सभाले अध्यक्षको मन्तव्यसहित सञ्चालक समितिको आर्थिक वर्ष २०७६÷७७ को वार्षिक प्रतिवेदनमाथि छलफल गरी पारित गर्ने छ । त्यस्तै लेखापरीक्षकको प्रतिवेदनसहितको आर्थिक वर्ष २०७६÷७७ को वासलात, नाफा नोक्सान हिसाब, आय व्यय हिसाब, इक्युटीमा भएको परिवर्तन सम्बन्धी विवरण तथा नगद प्रवाह विवरणसहितको वित्तीय विवरण छलफल गरी पारित गर्नेछ ।