महालक्ष्मी लाइफको खुद बीमाशुल्क ४३% ले बढ्यो, नाफामा सामान्य सुधार

काठमाडौं । महालक्ष्मी लाइफ इन्स्योरेन्सले चालु आवको दोस्रो त्रैमासको वित्तीय विवरण सार्वजनिक गरेको छ ।

इन्स्योरेन्सले यस अवधिमा ६७ करोड ९१ लाख ५१ हजार रुपैयाँ खुद बीमाशुल्क संकलन गरेको छ ।

कम्पनीले गत आर्थिक वर्षकोे सोही अवधिमा ४७ करोड २८ लाख ७६ हजार रुपैयाँ बीमाशुल्क संकलन गरेको थियो ।

गत आर्थिक वर्षको सोही अवधिको तुलनामा कम्पनीको खुद बीमाशुल्क ४३.६२ प्रतिशतले बढी हो ।

यस अवधिमा कम्पनीको खुद नाफामा सामान्य सुधार आएको छ । चालु आवको दोस्रो त्रैमाससम्मको अवधिमा कम्पनीले ५ करोड ३० लाख रुपैयाँ नाफा कमाएको छ ।

गत आवको यसै अवधिमा कम्पनीले ५ करोड १९ लाख रुपैयाँ खुद नाफा कमाएको थियो ।

कम्पनीले यस अवधिमा लगानी, कर्जा तथा अन्य आयबाट ६ करोड ७९ लाख रुपैयाँ आम्दानी गरेको छ ।

कम्पनीले बीमालेखको धितोमा कर्जाबाट ७२ लाख ३५ हजार रुपैयाँ आम्दानी गरेको छ ।

कम्पनीले अभिकर्ता कमिशनका लागि १२ करोड ९९ लाख रुपैयाँ खर्चेको छ ।

कम्पनीले यस अवधिमा ६ सय ७४ वटा बीमा दाबीवापत ७ करोड ६४ लाख ३३ हजार रुपैयाँ भुक्तानी गरेको छ भने २३ वटा बीमा दावीवापत ५ लाख ९३ हजार रुपैयाँ भुक्तानी गर्न बाँकी छ ।

यस अवधिमा कम्पनीमा तीन हजार २ सय ५० वटा बीमालेख जारी भएका छन् । गत आवको यसै अवधिमा कम्पनीमा तीन हजार ४ सय २८ वटा बीमालेख जारी भएका थिए ।

एक अर्ब ४० करोड रुपैयाँ चुक्ता पुँजी भएको कम्पनीको जगेडा कोषमा २० करोड २८ लाख रुपैयाँ सञ्चित छ ।

कम्पनीको बीमा कोषको आकार ५२.६६ प्रतिशतले बढेर एक अर्ब ७३ करोड ७४ लाख रुपैयाँ पुगेको छ ।