जेठ महिनामा मात्र करिब १ खर्ब रेमिटेन्स भित्रियो, अघिल्लो वर्षको तुलनामा ठूलो अनुपातमा नघट्ने

काठमाडौं ।  जेठ महिनामा मात्र नेपालमा ९४ अर्ब रुपैयाँको रेमिटेन्स आएको छ । कोभिड १९ को कारण विदेशबाट आउने रेमिटेन्स रकममा चैत र बैशाख महिनामा निकै नै कमी आएको थियो ।

सो आधारमा यो वर्ष अघिल्लो वर्षको तुलनामा करिब १ खर्ब ६० अर्ब रुपैयाँ रेमिटेन्स घट्ने अनुमान थियो । तर,जेठ महिनामा ९४ अर्ब रुपैयाँ रेमिटेन्स आएपछि अघिल्लो वर्षको तुलनामा ठूलो रकमले रेमिटेन्स नघट्ने देखिएको छ ।

जेठ महिनासम्ममा नेपालमा ७ खर्ब ७४ अर्ब रुपैयाँ रेमिटेन्स आएको छ । अघिल्लो वर्षको बैशाख महिनासम्मको तुलनामा यो ३ प्रतिशतले कमी हो ।

अघिल्लो वर्षको सोही अवधिमा विप्रेषण आप्रवाह १७.५ प्रतिशतले बढेको थियो । अमेरिकी डलरमा विप्रेषण आप्रवाह ५.१ प्रतिशतले घटेको छ । अघिल्लो वर्षको सोही अवधिमा यस्तो आप्रवाह ८.१ प्रतिशतले बढेको नेपाल राष्ट्र बैंकले जनाएको छ ।

समीक्षा अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत-नयाँ र वैधानिकीकरण) लिने नेपालीको संख्या १२.४ प्रतिशतले घटेको छ । अघिल्लो वर्षको सोही अवधिमा यस्तो संख्या ३५.७ प्रतिशतले घटेको थियो ।

वैदेशिक रोजगारीका लागि पुनः श्रम स्वीकृति लिने नेपालीको संख्या समीक्षा अवधिमा ३१.१ प्रतिशतले घटेको छ । अघिल्लो वर्षको सोही अवधिमा यस्तो संख्या ५.४ प्रतिशतले बढेको थियो ।

समीक्षा अवधिमा खुद ट्रान्सफर आयमा ३.६ प्रतिशतले कमी आई ८७२ अर्ब ७८ करोड रुपैयाँ कायम भएको छ । अघिल्लो वर्षको सोही अवधिमा यस्तो आय १६.६ प्रतिशतले बढेको थियो ।