नाफामा ठूलो असर पर्न नदिन बैंकको चलाखी: १३ बैंकको स्प्रेड दर ५% माथि, कस्को कति ?
काठमाडौं । कोरोना भाइरसको असरका कारण आम्दानीमा कटौति भएपछि बैंकहरुले निक्षेपमा दिने र कर्जामा लिने ब्याजदरबीचको अन्तर (स्प्रेड दर) बढाएका छन् ।
सञ्चालनमा रहेका २७ वाणिज्य बैंकमध्ये ०७६ चैत मसान्तमा १३ वटाको स्प्रेड दर ५ प्रतिशतभन्दा बढी छ । राष्ट्र बैंकको निर्देशन अनुसार स्प्रेड दर ४.५० प्रतिशतभन्दा बढी हुनु हुँदैन ।
तर, राष्ट्र बैंकले गत चैत १६ गते कोरोना प्रभावितलाई पहिलो चरणको राहत प्याकेज घोषणा गर्दै बैंकहरुलाई पनि केही सहुलियत दिएको थियो ।
‘वित्तीय प्रणालीमा समग्ररुपमा परेको प्रभावलाई मध्यनजर गरी २०७६ चैत महिनामा अनुपालन गर्नुपर्ने नियामकीय/शुपरिवेक्षकीय अनुपातहरु अनुपालना नभएको खण्डमा कुनै हर्जना लगाइने छैन,’ राष्ट्र बैंकले भनेको छ ।
यसरी तोकिएको भन्दा बढी स्प्रेड दर भए पनि राष्ट्र बैंकले कारबाही नगर्ने भएपछि बैंकहरुले नाफामा ठूलो असर पर्न नदिने चलाखी गरेका हुन् । व्याजदर घटाउनुपर्ने तीब्र दबाबमा रहेका बैंकहरुले स्प्रेड दर बढाएर त्यसको घाटा पूर्ति गर्ने रणनीति अबलम्बन गरेको देखिन्छ ।
चैत मसान्तमा सबैभन्दा बढी स्प्रेड दर माछापुच्छ्रे बैंकको (५.४१ प्रतिशत) छ । गत वर्षको यसै अवधिमा बैंकको स्प्रेड दर ४.२७ प्रतिशत थियो । त्यसयता लगातार बढाइरहेको छ ।
दोस्रो धेरै स्प्रेड राख्ने बैंक हो नविल । चैत मसान्तमा नविलको ५.३२ प्रतिशत छ । गत वर्षको यसै अवधिमा बैंकको स्प्रेड दर ४.४३ प्रतिशत थियो । नविलले पनि त्यसयता लगातार बढाइरहेको छ ।
चैत मसान्तमा तेस्रो धेरै स्प्रेड राख्ने बैंक हुन् स्ट्यान्डर्ड चार्टर्ड र प्रभु । यी दुबैको स्प्रेड दर ५.३२ प्रतिशत छ । गत वर्षको यसै अवधिमा प्रभुको ४.८८ प्रतिशत र चार्टर्डको ४.४५ प्रतिशत थियो ।
स्प्रेड धेरै राख्ने पाँचौं नम्बरमा मेगा बैंक छ । ०७६ चैत मसान्तमा ५.२२ प्रतिशत स्प्रेड राखेको छ । गत वर्षको यसै अवधिम यस्तो दर ४.७३ प्रतिशत थियो ।
त्यस्तै ग्लोबल आइएमइले ५.१८ प्रतिशत, एसबिआईले ५.१५ प्रतिशत, एभरेष्टले ५.१३ प्रतिशत, एनसीसी र सानिमाले ५.०८ प्रतिशत, हिमालयनले ५.४ प्रतिशत, इन्भेष्टमेन्टले ५.१ प्रतिशत र सिदार्थले ५ प्रतिशत स्प्रेड राखेका छन् । गत वर्षको यसै अवधिमा क्रमशः ४.६३, ४.८०, ४.६९, ३.१७, ५.६५, ४.५०, ४.२४ र ४.१५ प्रतिशत थियो ।
सबैभन्दा कम स्प्रेडदर राख्ने बैंक हो सिभिल । यो बैंकले ०७६ चैत मसान्तमा ४.०९ प्रतिशत स्प्रेड राखेको छ । गत वर्षको यसै अवधिमा यस्तो दर ३.३८ प्रतिशत थियो ।
कम स्प्रेड राख्ने दोस्रो बैंक हो लक्ष्मी । लक्ष्मीले ०७६ चैत मसान्तमा ४.३४ प्रतिशत स्प्रेड राखेको छ । गत वर्षको यसै अवधिमा यस्तो दर ४.१९ प्रतिशत थियो ।
०७५ चैतमा ५.६१ प्रतिश स्प्रेडदर भएको कृषि विकास बैंकले ०७६ चैतमा घटाएर ४.४२ प्रतिशतमा झारेको छ भने नेपाल बैंकले पनि ५.५० प्रतिशत रहेको स्प्रेडलाई ४.४९ प्रतिशतमा झारेको छ । यी २ बैंकबाहेक सबैले ०७५ चैतको तुलनामा ०७६ चैतमा स्प्रेडदर बढाएका छन् ।
| Bank | Chaitra 2076 | Poush 2076 | Ashad 2076 | Chaitra 2075 |
| CIVIL | 4.09% | 4.90% | 3.76% | 3.38% |
| Laxmi | 4.34% | 4.23% | 4.37% | 4.19% |
| Agricultural Development | 4.42% | 5.29% | 4.68% | 5.61% |
| Nepal Bank | 4.49% | 4.44% | 4.99% | 5.50% |
| Prime | 4.64% | 5.11% | 4.32% | 3.71% |
| Kumari | 4.65% | 4.37% | 3.54% | 3.61% |
| Rastriya Banijya | 4.70% | 5.53% | 4.46% | 4.70% |
| Century | 4.77% | 4.76% | 4.20% | 3.96% |
| BoK | 4.80% | 5.03% | 4.98% | 4.28% |
| Citizens | 4.85% | 4.58% | 3.15% | 4.56% |
| Sunrise | 4.86% | 5.14% | 4.44% | 4.37% |
| Nepal Bangladesh | 4.88% | 4.80% | 4.64% | 4.71% |
| NMB | 4.88% | 5.03% | 4.26% | 4.33% |
| NIC | 4.92% | 5.02% | 4.41% | 4.96% |
| Siddhartha | 5.00% | 5.17% | 4.07% | 4.15% |
| Nepal Investment | 5.01% | 5.16% | 4.38% | 4.24% |
| Himalayan | 5.04% | 5.32% | 4.47% | 4.50% |
| Sanima | 5.08% | 5.04% | 4.35% | 5.65% |
| NCC | 5.08% | 5.18% | 4.70% | 3.17% |
| Everest | 5.13% | 5.33% | 4.29% | 4.69% |
| Nepal SBI | 5.15% | 5.22% | 4.43% | 4.80% |
| Global IME | 5.18% | 5.31% | 4.47% | 4.63% |
| Mega | 5.22% | 5.60% | 4.73% | 4.73% |
| Prabhu Bank | 5.32% | 4.83% | 4.70% | 4.88% |
| Standard Chartered | 5.32% | 5.93% | 5.58% | 4.45% |
| Nabil | 5.34% | 4.99% | 4.45% | 4.43% |
| Machapuchre | 5.41% | 5.24% | 5.18% | 4.27% |
पुष्प दुलाल
