धागो कारखानाको जग्गा अझै फिर्ता भएन, करोडौं मूल्यपर्ने उपकरण जीर्ण

रुपन्देही । बुटवल धागो कारखानाको जग्गा अझै फिर्ता हुन सकेको छैन ।

बुटवल नगरपालिका– १२ रामनगरस्थित बुटवल औद्योगिक क्षेत्रमा रहेको बुटवल धागो कारखाना बन्द भएको वर्षौं भइसक्दा पनि सरकारले सञ्चालन गर्न नसक्दा उक्त जग्गा अनुत्पादक क्षेत्रमा गएको भन्दै बुटवल औद्योगिक क्षेत्र व्यवस्थापन लिमिटेडले फिर्ता माग गरेको छ ।

व्यवस्थापन कार्यालयको नाममा रहेको एक सय ४४ रोपनी जग्गा  लामो समयदेखि प्रयोगविहीन अवस्थामा छ । सो जग्गा धागो कारखनाबाट फिर्ता लिएर नयाँ उद्योग स्थापना गर्न चाहने उद्योगीलाई प्रदान गर्ने योजना कार्यालयको रहेको छ ।

‘जग्गामा अन्य उद्योग खोल्न सकिने सम्भावना छ,’ व्यवस्थापन लिमिटेडका प्रमुख तुलबहादुर रानाले भने । विसं २०६४ देखि बन्द रहेको सो धागो कारखानाको करिब ३३ बिगाहा जग्गा रहेको छ । विसं २०३२ मा स्थापना भएको उक्त औद्योगिक क्षेत्रमा अहिले ६४ वटा उद्योग चालु अवस्थामा छन् ।

सरकारी स्वामित्वको बुटवल धागो कारखाना बन्द हुँदा सो उद्योगका करोडौं मूल्यपर्ने उपकरण जीर्ण छन् । स्थानीयवासीले उद्योग खुलाउन पटक/पटक दबाब दिँदै आएका रुपन्देही उद्योग वाणिज्य सङ्घका अध्यक्ष दिनेशराज रेग्मीले बताए। उद्योगले बुटवल औद्योगिक क्षेत्रलाई तिनुपर्ने करिब रु एक करोड भाडा समेत तिरेको छैन ।