तीन लाख १५ हजार घर पुनःनिर्माण, सात लाख ३२ हजार ७७१ ले गरे अनुदान सम्झौता

काठमाडौँ । भूकम्पबाट भत्किएकामध्ये तीन लाख १५ हजार ८९७ घर पुनःनिर्माण सम्पन्न भएको राष्ट्रिय पुननिर्माण प्राधिकरणले जनाएको छ ।

प्राधिकरणमा सोमबारसम्म प्राप्त तथ्याङ्कअनुसार आठ लाख १२ हजार १६१ लाभग्राहीमध्ये सात लाख ३२ हजार ७७१ ले अनुदान सम्झौता गरेका छन् । सम्झौता गरेकामध्ये सात लाख २६ हजार ३३३ ले पहिलो किस्ता बुझेका छन् ।

पहिलो किस्ता लिएर पाँच लाख ६० हजार ७८१ लाभग्राहीले पुनःनिर्माण शुरु गरेका छन् । जग निर्माण गरी पाँच लाख ३१ हजार १९ भूकम्प पीडितले दोस्रो किस्ता माग गरेका छन् ।

दोस्रो किस्ताका लागि पाँच लाख २२ हजार १९३ परिवार प्रमाणीकरण भएको तथ्याङ्क प्रतिनिधिसभा, विकास तथा प्रविधि समितिको आजको बैठकमा प्रमुख कार्यकारी अधिकृत सुशील ज्ञवालीले प्रस्तुत गरे ।

सोमबारसम्म पाँच लाख १८ हजार ५५ लाभग्राहीले भुक्तानी पाएका छन् । तेस्रो किस्ता माग गर्नेको सङ्ख्या तीन लाख ४४ हजार ३९८ पुगेको छ । तेस्रो किस्ताका लागि तीन लाख ३४ हजार ५० भूकम्प पीडित प्रमाणीकरण भएका छन् । घर निर्माण सम्पन्न गरेका तीन लाख १९ हजार ६६९ परिवारलाई तेस्रो किस्ता वितरण गरिएको छ ।

विसं २०७२ वैशाख १२ गतेको भूकम्पले आंशिक क्षति भएका ५४ हजार ६५८ लाभग्राही प्रबलीकरण सूचीमा समावेश भएका छन् । जसमध्ये ११ हजार ८९५ ले अनुदान सम्झौता गरेका छन् । १० हजार ४६४ परिवारले पहिलो किस्ता लिएका छन् ।

प्रबलीकरण सूचीमा परेकाले दुई किस्तामा रु एक लाख पाउने प्राधिकरणको कार्यविधिमा उल्लेख छ । पुनःनिर्माण गर्नेले भने तीन किस्तामा तीन लाख अनुदान पाउँछन् ।

समितिको बैठकमा प्रमुख कार्यकारी अधिकृत ज्ञवालीले प्रगति विवरण प्रस्तुत गरेपनि गणपूरक सङ्ख्याको अभावमा आजलाई बैठक स्थगित गरिएको समितिका सभापति कल्याणी खड्काले जानकारी दिइन् । यसै साता समितिको बैठकमा पुनःनिर्माणका बारेमा छलफल हुने जनाइएको छ ।