जापानमा ७.१ म्याग्निच्युडको शक्तिशाली भूकम्प: सपिङ मल भत्कियो, ठूलो क्षतिको आशंका

एजेन्सी । जापानको क्युशु क्षेत्रमा पर्ने कुमामोटो प्रान्तमा मंगलबार ७.१ म्याग्निच्युडको शक्तिशाली भूकम्प गएको छ ।

भूकम्पका कारण ठूलो धनजनको क्षति भएको विवरणहरू प्राप्त भइरहेका छन् । जापानी भूकम्प मापन स्केल (सिन्डो) अनुसार यसको तीव्रता अधिकतम ‘७’ सम्म रेकर्ड गरिएको छ, जुन सबैभन्दा विनाशकारी स्तर मानिन्छ ।

स्थानीय अधिकारीहरूका अनुसार काशिमा शहरमा रहेको ‘इओन सपिङ मल’ को दोस्रो तला पूर्ण रूपमा भत्किएको छ । मलमा विस्फोट भएको र धुवाँ निस्किएको देखिएको प्रत्यक्षदर्शीले बताएको समाचार संस्थान जापान टाइम्सको समाचारमा उल्लेख गरिएको छ ।

कुमामोटो प्रहरी स्रोतका अनुसार भवन भत्किँदा त्यहाँ ठूलो संख्यामा मानिसहरू पुरिएका र धेरैको मृत्यु भएको हुनसक्ने आशंका गरिएको छ । करिब २०० मानिसहरूलाई मलको पार्किङ क्षेत्रमा सुरक्षित सारिएको छ।

घाइते र भौतिक क्षति

भूकम्पमा परी हालसम्म १०० भन्दा बढी मानिस घाइते भएको पुष्टि भएको छ। हिकावा शहरमा ५० र कुमामोटो शहरमा ५० भन्दा बढी घाइतेहरूलाई अस्पताल लगिएको छ जसमध्ये केहीको अवस्था गम्भीर छ । उकी शहरमा धेरै ठाउँमा आगलागी भएको र भवनहरू भत्किएको खबर छ । क्युशु एक्सप्रेसवेका पुलहरू र ओभरपासमा पनि ठूलो क्षति पुगेको छ।

भूकम्पका कारण बुलेट ट्रेन सेवा पूर्ण रूपमा बन्द गरिएको छ । क्युशु इलेक्ट्रिकका अनुसार करिब ४८,३०० घरमा विद्युत आपूर्ति बन्द भएको छ। राजमार्गहरू समेत बन्द गरिएका छन्।

प्रधानमन्त्री सानाए ताकाइचीले तत्काल ‘आपतकालीन विपद् कार्यदल’ गठन गर्दै ३,६०० आत्मरक्षा बलका सदस्यहरूलाई उद्धारका लागि परिचालन गरेकी छिन् । उनले भनिन्, ‘अहिलेको समय निकै महत्वपूर्ण छ र हाम्रो प्राथमिकता मानिसको ज्यान बचाउनु हो।’

उनले आगामी दिनमा अझै शक्तिशाली पराकम्पन आउन सक्ने भन्दै नागरिकहरूलाई सतर्क रहन आग्रह गरेकी छिन्।

सुनामी र आणविक सुरक्षा

भूकम्प लगत्तै आरियाके र यात्सुशिरो समुद्र तटमा सुनामीको चेतावनी दिइएको थियो जसलाई पछि हटाइएको छ । सरकारी अधिकारीहरूका अनुसार कागोशिमा प्रान्तमा रहेको सेन्दाई आणविक ऊर्जा केन्द्रमा कुनै पनि असामान्य अवस्था देखिएको छैन ।

भूकम्प यस्तो समयमा गएको छ जब जापानमा अत्यधिक गर्मी भइरहेको छ। विद्युत अवरुद्ध भएको र घरबारविहीन भएका मानिसहरूमा ‘हिटस्ट्रोक’ (लू) को जोखिम बढेको भन्दै सरकारले सावधानी अपनाउन भनेको छ।

यो भूकम्प १० वर्षअघि सन् २०१६ मा कुमामोटोमै गएको विनाशकारी भूकम्पको सम्झना दिलाउने गरी आएको छ । सन् २०२४ को जनवरीमा नोटो प्रायद्वीपमा गएको भूकम्पपछि जापानमा ‘सिन्डो ७’ रेकर्ड गरिएको यो पहिलो पटक हो । मौसम विभागले आगामी एक हप्तासम्म शक्तिशाली पराकम्पनहरू आउन सक्ने चेतावनी दिएको छ ।