ह्वाट्सएप ‘स्टोरेज फूल’ भएर फोन स्लो भयो ? यी सजिला उपायबाट बढाउनुहोस् मोबाइलको गति

एजेन्सी । आजको डिजिटल युगमा ह्वाट्सएप सञ्चारको लोकप्रिय माध्यम बनेको छ । व्यक्तिगत गफगाफदेखि व्यावसायिक कामका लागि यो एप अनिवार्य जस्तै भएको छ । तर, यसको अत्याधिक प्रयोगसँगै एउटा ठूलो समस्या पनि निम्तिने गरेको छ- त्यो हो मोबाइल स्टोरेज भरिने र फोन स्लो हुने समस्या ।

ह्वाट्सएपमा आउने अनगिन्ती फोटो, भिडियो, अडियो फाइल र डकुमेन्टहरूले फोनको आन्तरिक मेमोरी ओगट्दा स्मार्टफोन ह्याङ हुने र सुस्त चल्ने गर्दछ । यदि तपाईं पनि यस्तै समस्याबाट गुज्रिरहनु भएको छ भने ह्वाट्सएप भित्रै रहेका केही सेटिङहरू परिवर्तन गरेर आफ्नो फोनलाई पहिले जस्तै छिटो बनाउन सक्नुहुन्छ ।

ह्वाट्सएपको स्टोरेज व्यवस्थापन गर्नका लागि सबैभन्दा प्रभावकारी तरिका ‘म्यानेज स्टोरेज’ टुलको प्रयोग गर्नु हो । यसका लागि प्रयोगकर्ताले ह्वाट्सएपको सेटिङमा गएर ‘स्टोरेज एन्ड डाटा’ विकल्पभित्र प्रवेश गर्नुपर्छ । त्यहाँ ‘म्यानेज स्टोरेज’ सेक्सनमा जाँदा तपाईंको फोनको कति स्पेस ह्वाट्सएपले ओगटेको छ भन्ने स्पष्ट विवरण देखिन्छ । यस टुलले ५ एमबी भन्दा ठूला फाइलहरू र धेरै पटक फर्वार्ड गरिएका मेसेजहरूलाई छुट्टै वर्गमा राखिदिन्छ । प्रयोगकर्ताले ती ठूला र अनावश्यक फाइलहरूलाई एक-एक गरी वा एकैपटक छनोट गरेर डिलिट गर्न सक्छन्, जसले गर्दा फोनको धेरै खाली ठाउँ तुरुन्तै मुक्त हुन्छ ।

स्टोरेज भरिने अर्को मुख्य कारण ‘मिडिया अटो-डाउनलोड’  फिचर हो । धेरैजसो प्रयोगकर्ताको फोनमा यो फिचर ‘अन’ हुन्छ, जसका कारण ग्रुप वा व्यक्तिगत च्याटमा कसैले पठाएको फोटो वा भिडियो तपाईंले नचाहे पनि आफैं डाउनलोड भएर ग्यालरीमा बस्छन् । यसलाई रोक्नका लागि ह्वाट्सएप सेटिङको ‘स्टोरेज एन्ड डाटा’ मा गएर ‘मिडिया अटो-डाउनलोड’ सेक्सन अन्तर्गत मोबाइल डाटा र वाइफाइ दुवैमा सबै विकल्पहरूलाई अनचेक वा ‘नो मिडिया’ बनाउनुपर्छ । यसो गर्दा तपाईंले जुन फाइल हेर्न चाहनुहुन्छ, त्यसमा क्लिक गरेपछि मात्र डाउनलोड हुनेछ, जसले स्टोरेज र इन्टरनेट डाटा दुवैको बचत गर्छ ।

यसका साथै, ह्वाट्सएपले प्रयोगकर्ताको सुविधाका लागि ‘डिसेपेयरिङ मेसेज’ फिचर पनि उपलब्ध गराएको छ । यो फिचर कुनै निश्चित च्याट वा ग्रुपका लागि एक्टिभ गर्न सकिन्छ । यसलाई अन गरेपछि तपाईंले सेट गरेको समय (जस्तै २४ घण्टा, ७ दिन वा ९० दिन) पछि उक्त च्याटका मेसेज र मिडिया फाइलहरू आफैं डिलिट हुन्छन् । यसले गर्दा म्यानुअल रूपमा च्याट सफा गरिरहनु पर्ने झन्झट हुँदैन र स्टोरेज स्वतः व्यवस्थापन भइरहन्छ ।

त्यस्तै, ‘मिडिया भिजिबिलिटी’ अफ गर्नाले ह्वाट्सएपका फाइलहरू फोनको मुख्य ग्यालरीमा देखिँदैनन्, जसले ग्यालरी एपलाई भारी हुनबाट जोगाउँछ ।

ह्वाट्सएप भित्र कुन च्याट वा ग्रुपले सबैभन्दा धेरै स्टोरेज प्रयोग गरिरहेको छ भन्ने कुरा पनि म्यानेज स्टोरेजमै गएर हेर्न सकिन्छ । धेरै सक्रिय रहने ग्रुपहरूमा आउने अनावश्यक गफगाफ र फाइलहरूलाई समय-समयमा ‘क्लियर च्याट’ गर्नाले फोनको पर्फर्मेन्समा सुधार आउँछ ।

यी सामान्य तर अत्यन्तै महत्वपूर्ण ‘ट्रिक्स’ हरू अपनाउँदा मोबाइलको स्टोरेज मात्र सुरक्षित रहँदैन, बरु फोनको समग्र कार्यक्षमता र स्पिडमा पनि ठूलो परिवर्तन महसुस गर्न सकिन्छ ।