इरानले अमेरिकी प्रतिनिधिहरू नभेट्ने भनेपछि बढ्यो कच्चा तेलको मूल्य

एजेन्सी । इरानले अमेरिकी प्रतिनिधिहरूसँग भेट नगर्ने समाचार बाहिरिएपछि लगानीकर्ताहरूले प्रतिक्रिया जनाउँदा बुधबारको सुरुवाती कारोबारमा तेलको मूल्य बढेको छ । यसले चार महिना लामो युद्धपछि दुई देशबीच भएको अन्तरिम युद्धविराममा थप तनाव पैदा गरेको छ ।

ब्रेन्ट फ्युचर्स ५० सेन्ट वा ०.६९ प्रतिशतले बढेर प्रति ब्यारल ७३.४५ डलर पुग्यो भने अमेरिकी वेस्ट टेक्सस इन्टरमिडिएट कच्चा तेल ६३ सेन्ट वा ०.९१ प्रतिशतले बढेर प्रति ब्यारल ७०.१३ डलर पुग्यो ।

अमेरिकाका राष्ट्रपति डोनल्ड ट्रम्पका ज्वाइँ जेरेड कुश्नर र दूत स्टिभ विटकोफ मंगलबार ह्वाइट हाउसले उच्चस्तरीय भनेर वर्णन गरेको वार्ताका लागि दोहा पुगेका थिए । तर, इरान र आयोजक कतारले इरानीहरू आफैं भेट्नुको सट्टा मध्यस्थकर्ताहरूसँग भेट्ने बताएका छन् ।

कतारले विटकोफ र कुश्नरसँग भेट्नेहरूमा प्रधानमन्त्री शेख मोहम्मद बिन अब्दुल रहमान अल थानी पनि सामेल रहेको बताएको छ ।

ब्रेन्टको मूल्य यस वर्षको पहिलो र दोस्रो त्रैमासिकको बीचमा प्रति ब्यारल करिब ४५ डलरले घट्यो । यो सन् २००८ को वित्तीय संकटपछिको सबैभन्दा ठूलो त्रैमासिक गिरावट हो ।

यसैबीच अमेरिकी कच्चा तेल फ्युचर्स करिब ३१ डलरले घट्यो जुन सन् २०२० मा कोभिड–१९ महामारीले विश्वव्यापी तेलको माग ध्वस्त पारेपछिको सबैभन्दा ठूलो त्रैमासिक घाटा हो ।

पश्चिम एसियाको द्वन्द्व अन्त्य गर्ने दिशामा भएको प्रगतिपछि यो गिरावट आएको हो जसले पहिलेको युद्धका कारण भएको तीव्र वृद्धिलाई पछि सारेको छ ।

रोयटर्सले मंगलबार सार्वजनिक गरेको सर्वेक्षण अनुसार, हर्मुज जलयोजक पुनः खुलेसँगै दीर्घकालीन आपूर्ति अवरोधको चिन्ता कम भएपछि विश्लेषकहरूले इरान युद्ध सुरु भएयता पहिलोपटक सन् २०२६ को तेल मूल्य प्रक्षेपण घटाएका छन् । यसअघि लगातार पाँच महिनासम्म मूल्य प्रक्षेपण बढाइएको थियो ।

अमेरिकाका उपराष्ट्रपति जेडी भ्यान्सले द माइकल नोल्स शोमा बोल्दै इरानलाई उक्त जलयोजकबाट जाँदा शुल्क उठाउन रोक लगाइने बताए । उनले भने, ‘इरानीहरूले हर्मुज जलयोजकबाट जाने जहाजहरूबाट शुल्क असुल्ने स्थितिमा यो कुरा टुंगिने छैन ।’

यो महत्त्वपूर्ण जलमार्गबाट ट्यांकरहरूको आवतजावत पुनः सुरु हुन थालेको छ । भ्यान्सले उक्त जलमार्गबाट तेलको प्रवाह युद्धपूर्वको स्तरमा फर्किएको दाबी गरे ।

यसैबीच गत साता अमेरिकी कच्चा तेलको भण्डार र ग्यासोलिन स्टक पुनः घटेको छ । बजार स्रोतहरूले मंगलबार सार्वजनिक भएको अमेरिकी पेट्रोलियम इन्स्टिच्युटको तथ्यांकलाई उद्धृत गर्दै यो जानकारी दिएका हुन् ।

नाम नखुलाउने सर्तमा स्रोतहरूले जुन २६ मा समाप्त भएको हप्तामा कच्चा तेलको भण्डार ६१ लाख ब्यारलले घटेको बताएका छन् ।