विश्व फुटबलको ‘अभागी टोली’ नेदरल्यान्ड्स

एजेन्सी । विश्व फुटबलमा नेदरल्यान्ड्सको नाम उत्कृष्ट टोलीमध्ये गनिन्छ । ‘टोटल फुटबल’ शैलीको विकास, विश्वस्तरीय खेलाडी उत्पादन र आकर्षक खेलका कारण डच टोलीले दशकौँदेखि फुटबल समर्थकको मन जित्दै आएको छ ।

तर यति ठूलो प्रभाव हुँदाहुँदै पनि नेदरल्यान्ड्सले आजसम्म फिफा विश्वकपको उपाधि जित्न सकेको छैन । यही कारण विश्व फुटबलमा नेदरल्यान्ड्सलाई अनौपचारिक रूपमा ‘अभागी टोली’ भनेर चिन्ने गरिन्छ ।

अन्तर्राष्ट्रिय सञ्चारमाध्यमहरूले पनि नेदरल्यान्ड्सलाई विश्वकप जित्न नसकेको सबैभन्दा सफल टोलीका रूपमा चित्रण गरेका छन् । फिफाका अनुसार विश्वकपको फाइनल तीन पटक पुगेर पनि उपाधि जित्न नसकेको टोलीमध्ये नेदरल्यान्ड्स सबैभन्दा अगाडि छ ।

नेदरल्यान्ड्स पहिलो पटक सन् १९७४ को विश्वकप फाइनलमा पुगेको थियो। महान खेलाडी योहान क्रुइफको नेतृत्वमा ‘टोटल फुटबल’ शैली प्रदर्शन गर्दै फाइनलसम्म पुगे पनि आयोजक पश्चिम जर्मनीसँग २–१ ले पराजित भयो । धेरै फुटबल विश्लेषकले त्यस टोलीलाई विश्व फुटबल इतिहासकै उत्कृष्ट टोलीमध्ये एक मान्छन्, तर उपाधि भने हात लागेन ।

त्यसको चार वर्षपछि सन् १९७८ मा नेदरल्यान्ड्स फेरि फाइनलमा पुग्यो। यसपटक आयोजक अर्जेन्टिनासँग अतिरिक्त समयमा ३–१ ले पराजित भएपछि दोस्रो पटक पनि विश्वकप जित्ने सपना अधुरै रह्यो।

झण्डै तीन दशकपछि सन् २०१० मा नेदरल्यान्ड्सले तेस्रो पटक विश्वकप फाइनल खेल्यो । दक्षिण अफ्रिकामा भएको फाइनलमा स्पेनसँग अतिरिक्त समयमा १–० ले पराजित भएपछि डच टोलीको अर्को ठूलो अवसर पनि गुम्यो । एन्ड्रेस इनिएस्टाको निर्णायक गोलले नेदरल्यान्ड्सलाई फेरि उपविजेतामै सीमित बनायो ।

फाइनलमा लगातार असफल भए पनि नेदरल्यान्ड्सको प्रभाव भने विश्व फुटबलमा अत्यन्त ठूलो छ। योहान क्रुइफ, मार्को भान बास्टेन, रुड गुलिट, डेन्निस बर्गक्याम्प, रोबिन भान पर्सी, आर्यन रोबेन, भर्जिल भान डाइकजस्ता विश्वस्तरीय खेलाडी उत्पादन गरेको यो राष्ट्रलाई धेरै अन्तर्राष्ट्रिय विश्लेषकहरूले विश्वकप जित्न नसकेको सबैभन्दा उत्कृष्ट टोलीका रूपमा व्याख्या गरेका छन् ।

सन् २०१४ को विश्वकपमा नेदरल्यान्ड्स तेस्रो भएको थियो भने त्यसयता पनि टोलीले विश्व फुटबलमा प्रतिस्पर्धात्मक प्रदर्शन गर्दै आएको छ । तर तीन फाइनलको पीडा र विश्वकप उपाधिको अभावले डच टोलीमाथि लागेको ‘अभागी टोली’को छवि अझै हट्न सकेको छैन ।

यद्यपि फुटबल विश्लेषकहरूको विश्वास छ, नेदरल्यान्ड्ससँग हरेक पुस्तामा विश्वस्तरीय प्रतिभा जन्मिने भएकाले कुनै न कुनै दिन यो टोलीले विश्वकप जित्दै दशकौँदेखि लागेको ‘अभागी टोली’को परिचय अन्त्य गर्ने क्षमता राख्छ ।