कतारको हौसला बढाउन समर्थकहरूलाई सरकारले सबै खर्च बेहोरेर क्यानडा पठायो

एजेन्सी । कतारले आफ्ना समर्थकहरूको ठूलो समूहलाई उत्तर अमेरिकाको सम्पूर्ण खर्च बेहोर्ने गरी भ्रमण गराउँदै विश्वकपमा टोलीको मनोबल बढाउने अनौठो उपाय अपनाएको छ ।

बिहीबार क्यानडासँग हुने महत्त्वपूर्ण खेलअघि कतारका अमिर शेख तमिम बिन हमाद अल थानीले चार्टर्ड गरेका विशेष विमानमार्फत करिब १ हजार कतारी समर्थकहरू क्यानडाको भ्यानकुभर आइपुगेका छन् । यी समर्थकहरूलाई शहरका फेरमन्ट र जेडब्ल्यू म्यारियट पार्क जस्ता अत्यन्तै विलासी होटलहरूमा राखिएको छ ।

शहरका मुख्य भागहरूमा आफ्नो परम्परागत दार्बुका ड्रम बजाउँदै हिँडिरहेका यी समर्थकहरूले अहिले धेरैको ध्यान खिचिरहेका छन् ।

टोलीका कप्तान अब्दुलअजिज हातेमले समर्थकहरूको यो साथप्रति खुसी व्यक्त गर्दै यहाँसम्मको लामो यात्रा तय गरेर आउने सबैलाई धन्यवाद दिएका छन् । उनले आफूहरू आफ्नो जिम्मेवारीप्रति निकै सचेत रहेको र रंगशालामा आएका समर्थकहरू खुसी भएर फर्किऊन् तथा उनीहरूले टोलीमाथि गर्व गर्न सकून् भन्नका लागि मैदानमा जे जस्तो मेहनत गर्न पनि तयार रहेको बताए ।

कतारको सामाजिक तथा खेलकुद योगदान कोष र त्यहाँको फुटबल महासंघको साझेदारीमा कतारी समर्थक प्रतिनिधिमण्डल कार्यक्रम अन्तर्गत यो सबै प्रबन्ध मिलाइएको हो । यस कार्यक्रमले समर्थकहरूको हवाई भाडा, होटल बसाइ, स्थानीय यातायात र अन्य विभिन्न सुविधाहरूको खर्च बेहोर्ने गरेको छ ।

फुटबल महासंघका अनुसार यसरी समर्थकहरूलाई ल्याउनुको मुख्य उद्देश्य रंगशालामा एक जीवन्त र उत्साहजनक वातावरण सिर्जना गर्नु हो । त्यसले खेलाडीहरूलाई विश्वमञ्चमा उत्कृष्ट नतिजा ल्याउन प्रेरित गरोस् । आफ्नै देशबाट आएका समर्थकहरूका साथै अमेरिका र क्यानडामा अध्ययन गरिरहेका कतारी विद्यार्थीहरूलाई पनि खेल हेर्न विशेष निमन्त्रणा गरिएको छ ।

भ्यानकुभरको बिसी प्लेस रंगशालामा हुन लागेको खेलमा रातो जर्सीमा सजिएका घरेलु क्यानडेली समर्थकहरूको ठूलो भीड हुने भए तापनि कतारी समर्थकहरूले आफ्नो टोलीको पक्षमा ठूलो आवाज बुलन्द गर्ने तयारी गरेका छन् ।

प्राकृतिक ग्यास र तेलको प्रमुख निर्यातक कतारको जनसंख्या करिब ३२ लाख मात्र छ । सन् २०२२ को विश्वकप आयोजना गरेर चर्चामा आएको कतार सोही संस्करणमार्फत पहिलोपटक विश्वकपमा सहभागी भएको थियो । तर, त्यतिबेला आयोजकका रूपमा समूह चरणका सबै खेल हार्ने पहिलो राष्ट्र बनेर उसले नमीठो रेकर्ड बनाएको थियो ।

यसपटकको विश्वकपमा भने कतारले निकै सुधारिएको प्रदर्शन गरिरहेको छ । क्यालिफोर्नियामा भएको खेलमा बोआलेम खोउखीले इन्जुरी समयमा गोल गर्दै स्विट्जरल्यान्ड जस्तो बलियो टोलीलाई १–१ को बराबरीमा रोकेर कतारले सबैलाई आश्चर्यचकित पारेको थियो ।

यता घरेलु टोली क्यानडाले पनि यसपटक आफ्नो ऐतिहासिक सफलता हात पारेको छ । गत शुक्रबार टोरन्टोमा बोस्निया–हर्जेगोभिनासँग १–१ को बराबरी खेल्दै क्यानडाले विश्वकपमा आफ्नो पहिलो अंक जोड्न सफल भयो । उक्त खेलको ७८औं मिनेटमा सायल लारिनले गोल गर्दै क्यानडालाई हारबाट जोगाएका थिए ।

अहिले दुवै टोली १–१ अंकका साथ मैदानमा उत्रिँदै गर्दा भ्यानकुभरको रंगशालामा कतारी र क्यानडेली समर्थकहरूबीचको रोचक प्रतिस्पर्धा देखिने अपेक्षा गरिएको छ ।