एजेन्सी । पछिल्लो समय प्रविधि कम्पनी गुगलले आफ्ना विभिन्न सेवाहरूमा आर्टिफिसियल इन्टेलिजेन्स (एआई) लाई तीव्र रूपमा जोड्दै लगेको छ ।
यसै क्रममा गुगल डक्समा पनि ‘जेमिनाई’ एआई फिचर समावेश गरिएको छ, जसले प्रयोगकर्तालाई ड्राफ्ट लेख्न, सामग्री परिमार्जन गर्न र नयाँ आइडियाहरू खोज्न सहयोग पुर्याउँछ। तर, सबै प्रयोगकर्तालाई यो फिचर उपयोगी नलाग्न सक्छ ।
कतिपयले यसलाई काममा अवरोध पुर्याउने र झन्झटिलो मान्ने गरेका छन् । यस्तो अवस्थामा गुगल डक्समा एआई फिचरलाई कसरी बन्द गर्ने ? पछिल्लो समय धेरैले यसबारे चासो दिने गरेका छन् ।
गुगल डक्समा एआई वा ‘हेल्प मी राइट’ फिचर बन्द गर्नका लागि प्रयोगकर्ताले केही सामान्य प्रक्रियाहरू अपनाउनुपर्ने हुन्छ ।
यदि तपाईं व्यक्तिगत गुगल खाता प्रयोगकर्ता हुनुहुन्छ भने, डक्सको सेटिङ्स वा टुलबारमा रहेको ‘जेम्स’ वा एआई आइकनमार्फत यसलाई व्यवस्थापन गर्न सक्नुहुन्छ । सेटिङ्समा गएर एआई असिस्टेन्ट वा जेनेरेटिभ एआई सम्बन्धी विकल्पलाई ‘डिसेबल’ वा अनचेक गरेपछि लेख्ने क्रममा आउने अनावश्यक एआई सुझावहरू रोकिन्छन् ।
यसले प्रयोगकर्तालाई एआईको हस्तक्षेप बिना पुरानै शैलीमा काम गर्ने वातावरण प्रदान गर्दछ ।
त्यस्तै, व्यावसायिक वा शैक्षिक संस्थाको ‘गुगल वर्कस्पेस’ खाता प्रयोग गर्नेहरूको हकमा भने यो प्रक्रिया केही फरक हुन सक्छ ।
यस्तो अवस्थामा एआई फिचर बन्द गर्ने अधिकार प्रायः संस्थाको आइटी एड्मिनिस्ट्रेटरसँग हुन्छ । यदि एड्मिनले प्रयोगकर्तालाई नियन्त्रणको अनुमति दिएको छ भने मात्र सेटिङमा गएर यसलाई हटाउन सकिन्छ ।
एआई फिचर बन्द गर्दा डकुमेन्टको लेआउट सफा देखिने र एकाग्र भएर काम गर्न सजिलो हुने भएकाले धेरै प्रयोगकर्ताहरूले यो विकल्प खोजिरहेका छन् । प्रविधिको प्रयोग गर्दा आफ्नो सहजता र गोपनीयतालाई प्राथमिकता दिनु नै उचित हुने देखिन्छ ।
प्रतिक्रिया