जुलाईमा २५०औं वर्षगाँठ मनाउँदै अमेरिका, तर खुशी छैनन् धेरै अमेरिकीहरू

एजेन्सी । अमेरिकाले जुलाई महिनामा आफ्नो २५०औं जन्मदिन मनाउन लागेका बेला रोयटर्स/इप्सोसको सर्वेक्षणका अनुसार पाँचमध्ये दुई अमेरिकीहरूलाई यो राष्ट्र अबको अर्को २५० वर्षसम्म टिकिरहनेछ भन्ने विश्वास छैन । राष्ट्रले आफूलाई कसरी हेर्छ भन्ने विषयमा रहेको गहिरो विभाजनलाई पनि यस सर्वेक्षणले उजागर गरेको छ ।

सोमबार सम्पन्न भएको चार दिने सर्वेक्षण यस्तो समयमा आएको छ जब राष्ट्रपति डोनल्ड ट्रम्पले जुलाई ४ को उत्सवमा ध्रुवीकरण गर्ने खालका तडकभडकहरू समावेश गरेका छन् । यस वर्षको जुलाई ४ ले अमेरिकाका संस्थापकहरूले बेलायतबाट स्वतन्त्रता घोषणा गरेको २५० वर्ष पुगेको अवसरलाई जनाउँछ ।

ट्रम्पले यस वार्षिकोत्सवका धेरै कार्यक्रमहरूको केन्द्रमा आफूलाई राखेका छन् जसमा आइतबार आफ्नो जन्मदिनको अवसरमा ह्वाइट हाउसमा केज म्याच (पिँजडाभित्रको कुस्ती) आयोजना गर्नु समेत समावेश छ ।

सोमबार उनले वाशिङटनमा हुने जुलाई ४ को उत्सवमा आफू मुख्य आकर्षण हुने बताए जुन कार्यक्रम नोभेम्बरको मध्यावधि निर्वाचनमा संसदमा आफ्नो नियन्त्रण कायम राख्न खोजिरहेका रिपब्लिकनहरूका लागि राजनीतिक र्यालीको रूपमा समेत प्रयोग हुनेछ ।

ट्रम्पले आफ्नो राष्ट्रपतीय कार्यकाललाई डेमोक्रेटहरूद्वारा अमेरिकालाई ध्वस्त हुनबाट जोगाउने प्रयासको रूपमा प्रस्तुत गरेका छन् । डेमोक्रेटिक नेताहरूले भने ट्रम्प नै लोकतन्त्रका लागि खतरा भएको दाबी गर्छन् र उनले आफ्ना राजनीतिक आलोचकहरूलाई निशाना बनाउन संघीय कानुन कार्यान्वयन निकायहरूको प्रयोग गरिरहेको आरोप लगाउँछन् ।

सर्वेक्षणका करिब ३८ प्रतिशत सहभागीहरूले, जसमा ४० प्रतिशत डेमोक्रेट र २६ प्रतिशत रिपब्लिकनहरू समावेश छन्, अबको २५० वर्षपछि अमेरिका एउटै देशको रूपमा अस्तित्वमा रहनेछ भन्ने आफूलाई नलागेको बताएका छन् । ६२ प्रतिशतले मात्र आफ्नो राष्ट्र टिकिरहने सोचेका थिए ।

ट्रम्पले डेमोक्रेटहरू र विशेषगरी जो बाइडनको अघिल्लो प्रशासनमाथि आफ्ना सहयोगीहरूलाई गैरकानुनी रूपमा निशाना बनाएको आरोप लगाएका छन् जसमा ६ जनवरी २०२१ मा अमेरिकी संसदमा भएको आक्रमणमा संलग्न व्यक्तिहरू पनि पर्छन् । त्यो सन् २०२० को राष्ट्रपतीय निर्वाचनमा ट्रम्पको हारलाई उल्टाउने प्रयास थियो । रिपब्लिकनहरूले ट्रम्पमाथि भएका धेरैपटकका हत्या प्रयासहरूलाई पनि विपक्षीहरू हिंसामा उत्रिएको प्रमाणको रूपमा औंल्याएका छन् ।

सर्वेक्षणका दुई तिहाइ सहभागीहरूले, जसमा ८५ प्रतिशत डेमोक्रेट र ५० प्रतिशत रिपब्लिकनहरू छन्, अमेरिकी लोकतन्त्र विफल हुने खतरामा रहेको कुरामा सहमति जनाएका छन् । लोकतन्त्रलाई जोखिममा देख्नेहरूको कुल हिस्सा गत वर्षको अगस्टमा गरिएको सर्वेक्षणको ५७ प्रतिशतबाट बढेको छ । लोकतन्त्रको स्थायित्वप्रति चिन्तित रिपब्लिकनहरूको संख्या बढ्नु यो वृद्धिको मुख्य कारण हो ।

ट्रम्पले वर्षौंदेखि सन् २०२० को आफ्नो हार व्यापक मतदाता जालसाजीको परिणाम भएको झूटो दाबी गर्दै आएका छन् र मतदानसम्बन्धी कानुनमा परिवर्तनका लागि दबाब दिइरहेका छन् । सर्वेक्षणमा सहभागी करिब ७७ प्रतिशतले आगामी पाँच वर्षमा राजनीतिक हिंसा बढ्ने सम्भावना रहेको बताएका छन् ।

सर्वेक्षणले अमेरिकालाई विश्वकै उत्कृष्ट देश मान्ने अमेरिकीहरूको संख्या पनि घट्दै गएको देखाएको छ । ट्रम्पको पहिलो कार्यकालको समयमा अर्थात् नोभेम्बर २०१७ मा गरिएको रोयटर्स/इप्सोस सर्वेक्षणमा ३८ प्रतिशतले अमेरिकालाई विश्वको महान् देश मानेका थिए जुन अहिले घटेर ३० प्रतिशतमा सीमित भएको छ ।

यस्तो धारणा राख्ने डेमोक्रेटहरूको हिस्सा २६ प्रतिशतबाट झरेर ११ प्रतिशत पुगेको छ भने रिपब्लिकनहरूको हिस्सा १० मध्ये करिब ६ जनाकै हाराहारीमा स्थिर रहेको छ ।

अधिकांश अमेरिकीहरूले, जसमा तीन–चौथाइ डेमोक्रेट र आधा रिपब्लिकनहरू छन्, देशको २५०औं वार्षिकोत्सवका कार्यक्रमहरू धेरै नै राजनीतिक भएको बताएका छन् ।

स्वतन्त्रता दिवस कसरी मनाउने भन्ने जस्ता सामान्य कुराहरूमा पनि अमेरिकीहरू विभाजित देखिएका छन् । करिब ५२ प्रतिशत रिपब्लिकनहरूले आफ्नो उत्सवमा अमेरिकी झण्डाको रंगका लुगाहरू (रातो, सेतो र निलो) लगाउने बताएका छन् भने डेमोक्रेटहरूमा यो संख्या २० प्रतिशत मात्र छ ।

आतिशबाजी हेर्न जाने योजना बनाउनेहरूमा पनि डेमोक्रेट (२८ प्रतिशत) भन्दा रिपब्लिकन (४६ प्रतिशत) बढी देखिएका छन् ।
अनलाइनमार्फत गरिएको यो सर्वेक्षणमा देशभरका १५ सय ३७ अमेरिकी वयस्कहरू सहभागी थिए र यसको नतिजामा ३ प्रतिशतको मार्जिन अफ एरर रहेको छ ।