४ वटै जहाज सी-चेक गर्नु नपर्दा वायुसेवा निगमको व्यापारमा उछाल, साढे २ अर्बले बढ्यो आम्दानी

निगमका ४ वटै अन्तर्राष्ट्रिय उडानका जहाजले नियमित उडान गरिरहेका र यो वर्ष ‘सेड्युल्ड मेन्टेनेन्स’मा जानु नपरेका कारण यात्रुसँगै व्यापारसमेत बढेको देखिएको छ । यो वर्ष निगममा नेतृत्व अभाव भए पनि जहाजमा कुनै प्राविधिक समस्या नभएकाले निगमको अतिरिक्त मेहनत गरेन । तर पनि नियमित उडानबाटै पछिल्लो १० महिनमा ५ लाख यात्रु उडाउन साढे १४ अर्बभन्दा बढीको व्यापार गरेको छ ।

काठमाडौं । राष्ट्रिय ध्वजाबाहक नेपाल वायुसेवा निगमको आम्दानी पछिल्लो १० महिनामा उल्लेख्य वृद्धि भएको छ । निगमले चालू आर्थिक वर्ष २०८२/८३ को पहिलो १० महिना (साउन–वैशाख) सम्ममा १४ अर्ब ६९ करोड रुपैयाँ कमाएको छ । निगमले यात्रुलाई बिक्री गरेको हवाई टिकट तथा कार्गो सेवाबाट गरेको यस्तो आम्दानी गत आर्थिक वर्ष २०८१/८२ को सोही अवधिको तुलनामा २४.९१ प्रतिशतले बढी हो ।

निगमले गत वर्ष ११ अर्ब ७६ करोड रुपैयाँ यात्रु सेवा बिक्रीबाट गरेको व्यापारमा यो वर्ष २ अर्ब ९३ करोड रुपैयाँ थप भएको निगमले सार्वजनिक गरेको वैशाखसम्मको तथ्यांकले देखाएको छ । निगमले यस्तो आम्दानीका लागि चालू आवको १० महिनामा ५ लाख ३६ हजार यात्रुलाई सेवा दिएको छ।

निगमको यस्तो आम्दानी गत आर्थिक वर्षको १० महिनामा अघिल्लो वर्ष २०८०/८१ को तुलनामा भने १ अर्ब ३७ करोड रुपैयाँ अर्थात् १० प्रतिशतले घटेको थियो ।

वायुसेवा निगमका प्रवक्ता देवेन्द्र पुनका अनुसार यो वर्ष निगमको अन्तर्राष्ट्रिय उडानका जहाजले नियमित उडान गरिरहेका छन् । चारवटै जहाज यो वर्ष नियमित सेड्युल्ड मेन्टेनेन्समा गएका छैनन् ।

उनका अनुसार दुई वर्षअगाडिको नियमित मर्मत आगामी असारमा वाइडबडीको हुन्छ भने न्यारोबडी आगामी आर्थिक वर्षमा मात्रै ‘सी-चेक’ मा जानेछ । गत आवको तुलनामा यो वर्ष निगमले दिल्लीमा उडान थप गरेको र उडान व्यवस्थापन मिलाएर यात्रु सेवा संख्या बढाउँदा व्यापार बढेको देखिएको पनि पुनले क्लिकमान्डुलाई जानकारी दिए ।

निगमको यात्रु उडान समेत गत वर्षको तुलनामा चालू आवको वैशाखसम्ममा ८७ हजारले बढेको छ । गत वर्ष निगमले उक्त अवधिमा ४ लाख ४९ हजार यात्रुलाई सेवा दिएको थियो ।

गत आर्थिक वर्षमा निगमको आन्तरिक उडानका जहाज लामो समय थन्किनु र अन्तर्राष्ट्रिय उडानका जहाज पनि मर्मतसम्भारका नाममा पालैपालो लामो समय थन्किनुको असर आम्दानीमा परेको थियो । चालू आवमा गत वर्षको तुलनामा यात्रु सेवा बढ्नु र व्यापारसमेत विस्तार हुनुलाई निगमले सकारात्मक रूपमा लिएको छ । आगामी आर्थिक वर्षमा अहिलेको यात्रु वृद्धिदर र व्यापारलाई अझै उचाइमा पुऱ्याउने रणनीति निगमले लिएको पनि पुनले बताए ।

निगमले गर्ने उडानमा आन्तरिकतर्फ जहाज अभाव भएको र सेवामूलक मात्रै उडान भएकाले जम्मा २१ हजार यात्रुलाई मात्रै सेवा दिएर १० करोड रुपैयाँको मात्रै व्यापार गरेको छ ।

निगमको अन्तर्राष्ट्रिय उडानमा भने सबैभन्दा बढी यात्रु भारतको नयाँदिल्ली उडानमा हुने गरेका छन् । यो गन्तव्यमा गरेको उडानबाट निगमले १ लाख २६ हजार यात्रुलाई पछिल्लो १० महिनामा उडान सेवा दिँदा १ अर्ब २६ करोड रुपैयाँ आम्दानी गरेको छ ।

निगमको आम्दानीको सबैभन्दा आकर्षक गन्तव्य जापान हो । जापानको नारितामा गरेको उडानबाट निगमले पछिल्लो १० महिनामा ४ अर्ब ८३ करोड रुपैयाँ आम्दानी गरेको छ । यो गन्तव्यमा साउनदेखि वैशाखसम्म ६४ हजार यात्रुलाई सेवा दिएको पनि निगमले जारी गरेको तथ्याङ्कले देखाएको छ ।

नेपाल वायुसेवा निगमको चालु आव २०८२/८३ को १० महिनाको यात्रु उडान र आम्दानी विवरण

उडानका गन्तव्यहरु	१० महिनाको जम्मा यात्रु संख्या	१० महिनाको जम्मा आम्दानी (रु.)
आन्तरिक उडान	२१,६३८	१०९,३३१,२९४
जापान	६३,२१९	४,८३८,४९६,५८१
दुबाइ	७९,७४२	२,०९४,२६८,९८७
दिल्ली	१२६,६६२	१,२६२,२६५,२९२
क्वालालम्पुर	३९,५१७	८९७,७६१,१२६
दोहा	८६,६०५	२,३२९,५१४,३०८
बैंकक	२७,९४८	८१६,२७३,२६०
हङकङ	१५,७८९	६४४,०६३,८४९
मुम्बै	२१,६५५	२९३,११०,६२०
बैंगलोर	२४,०७१	५३५,७१२,५४८
दमाम	१९,१५२	६१९,१२०,३०८
ग्वान्जाओ	१०,०१३	२५७,२७६,०२६
जम्मा	५३६,०११	१४,६९७,१९४,१९९