आरसीबीले लगातार दोस्रोपटक आईपीएल जितेपछि १.७८ अर्ब डलरमा टिम किनेका मालिकहरूको उत्कृष्ट सुरुवात

एजेन्सी । प्रतिष्ठित इन्डियन प्रिमियर लिग (आईपीएल) लगातार दुई वर्ष जित्नु निकै कठिन काम हो । रोयल च्यालेन्जर्स बेंगलुरु (आरसीबी) ले ठ्याक्कै त्यही गरेको छ र यसको समय निकै रोचक छ ।

मार्चको अन्त्यतिर लन्डनमा रहेको मदिरा उत्पादक विशाल कम्पनी डियाजियोको भारतीय शाखा युनाइटेड स्पिरिट्सको स्वामित्वमा रहेको यस टोलीलाई आदित्य बिडला समूहको नेतृत्वमा रहेको एउटा कन्सोर्टियमले खरिद गरेको थियो जसमा टाइम्स अफ इन्डिया ग्रुप, बोल्ट भेन्चर्स र ब्ल्याकस्टोन समावेश थिए । यो सम्झौता १.७८ अर्ब डलरमा भएको थियो ।

याजियोका लागि यो आफ्नो विश्वव्यापी वासलातबाट ऋण घटाउने एउटा तरिका थियो । ‘आरसीबी नम्बर १ टोली भएको बेला यसलाई खरिद गरिएको थियो । साथै, यो सबै आईपीएल टोलीहरूमध्ये सबैभन्दा जोसिलो टोलीको रूपमा चिनिन्छ,’ हरिस बिजुर कन्सल्ट्सका सीईओ हरिस बिजुर भन्छन् । पक्कै पनि खरिद प्रक्रिया अझै पूर्ण भइसकेको छैन तर यसले कन्सोर्टियमलाई उत्कृष्ट सुरुवात दिएको छ ।

‘टोली अहिले निकै उच्च मनोबलमा छ । चेन्नई सुपर किंग्स र मुम्बई इन्डियन्सले मात्र लगातार आईपीएल जितेका छन्,’ अल्केमिस्ट मार्केटिङ सोलुसनका प्रबन्ध निर्देशक मनिष पोरवाल औंल्याउँछन् । एक वर्षभन्दा केही बढी समयमा अहमदाबादमा रहेको टोरेन्ट समूहले गुजरात टाइटन्समा बहुमत हिस्सा खरिद गर्यो र गत महिना स्टिल उद्योगपति लक्ष्मी निवास मित्तल र उनका छोरा आदित्यले आफ्नो पारिवारिक कार्यालयमार्फत राजस्थान रोयल्सको ७५ प्रतिशत हिस्सा खरिद गरे ।
विशेषगरी आरसीबीको हकमा यसको ब्रान्ड भ्यालु निकै बढ्ने अपेक्षा गरिएको छ । तर, युनाइटेड स्पिरिट्सको स्वामित्वमा रहेको ब्रान्ड रोयल च्यालेन्जको नामबाट यसको नाम राखिएको हुनाले नयाँ मालिकहरूले यसलाई कसरी अगाडि बढाउने भन्नेमा केही अनिश्चितता कायमै छ ।
बिजुरका अनुसार, आरसीबी अब एउटा ब्रान्ड मात्र नभएर सर्वसाधारणको मुखमा झुन्डिएको साझा नाम भइसकेको छ ।
‘यो यसरी नै रहनुपर्छ र शायद यसको लोगोमा निकै सामान्य परिवर्तनको बारेमा विचार गर्न सकिन्छ । साथै, टोलीको नाम रोयल च्यालेन्जर्स हो, रोयल च्यालेन्ज होइन,’ उनी भन्छन् ।
ब्रान्ड निकै प्रतिष्ठित भएको हुनाले खरिदकर्ताहरूले यस बारेमा चलाखीपूर्वक सम्झौता गरेको हुनुपर्ने कुरा थप्छन् । शायद यसभन्दा ठूलो चिन्ता यसको स्टार खेलाडी विराट कोहलीको सम्भावित संन्यास हुन सक्छ ।
‘यसले आरसीबीका लागि ठूलो धक्का पुर्याउनेछ तर उनीहरूले यसको हिसाबकिताब पहिल्यै गरिसकेका होलान्,’ पोरवाल भन्छन् ।