मानवाकार रोबोट बनाउने चिनियाँ कम्पनी पर्यो एनभिडियाको छनोटमा

एजेन्सी । अमेरिकी चिप निर्माता कम्पनी एनभिडियाले स्ट्यानफोर्डदेखि ईटीएच जुरिचसम्मका अनुसन्धाताहरूलाई बिक्री गरिरहेको पहिलो रोबोटिक्स प्रणालीका लागि चिनियाँ ह्युमनोइड रोबोट निर्माता कम्पनी युनिट्रीलाई छनोट गरेको कम्पनीले सोमबार घोषणा गरेको छ ।

यस प्रणालीले युनिट्रीको करिब ६ फिट अग्लो एच२ ह्युमनोइड रोबोटलाई एनभिडियाको जेटसन थोर हार्डवेयरसँग जोड्छ जसमा अन–डिभाइस आर्टिफिसियल इन्टेलिजेन्स क्षमताका लागि कम्पनीको उन्नत ब्ल्याकवेल जीपीयू समावेश छ ।

एक प्रेस विज्ञप्तिका अनुसार, नयाँ रोबोट परीक्षण प्याकेजमा आइज्याक रुट भनिने एनभिडियाका ह्युमनोइड–केन्द्रित एआई मोडल र सिमुलेशन प्रणालीहरू समावेश छन् । रोबोटमा सिंगापुरस्थित कम्पनी शार्पाले बनाएका मेकानिकल हातहरू पनि प्रयोग गरिएको छ ।

पिचबुकले उक्त स्टार्टअपका समर्थकहरूमा किमिङ भेन्चर पार्टनर्सलाई सूचीकृत गरेको छ ।

एनभिडियाका सीईओ जेन्सेन ह्वाङले फिजिकल एआई दशौं ट्रिलियन डलरको बजार बन्न सक्ने भविष्यवाणी गरेका छन् । उनले गत महिना लगानीकर्ताहरूलाई आगामी पाँच वर्षमा रोबोटिक्स क्षेत्रमा तीव्र वृद्धि हुने अपेक्षा गरेको बताएका थिए ।

‘आज हामी एनभिडिया आइज्याक रुट घोषणा गर्दैछौं जुन एक सन्दर्भ ह्युमनोइड रोबोट हो । यो पूर्ण रूपमा एकीकृत छ जसमा शार्पाले बनाएको प्रत्येक हातमा २५ डिग्री अफ फ्रिडम र रोबोटमा ३१ डिग्री अफ फ्रिडम छ । साथै, यो ६ फिट अग्लो र १५० पाउन्डको छ, ठ्याक्कै म जस्तै,’ ह्वाङले सोमबार ताइपेईमा गरेको सम्बोधनमा भने ।

‘यो प्लेटफर्मले नयाँ थोर चलाउँछ र हाम्रो सम्पूर्ण सफ्टवेयर स्ट्याक, डेटा जेनरेशन स्ट्याक, डेटा सिमुलेशन स्ट्याक र रनटाइम सबै एउटै रोबोटमा एकीकृत गरिएको छ । यो सबैले प्रयोग गर्न मिल्ने गरी डिजाइन गरिएको छ,’ उनले थपे ।

‘हामीले यसलाई उच्च शिक्षा र विश्वविद्यालयका अनुसन्धाताहरूका लागि बनाएका हौं किनभने तिनीहरूका लागि यस्तो बनाउनु अत्यन्तै गाह्रो काम हो ।’

नयाँ प्रणालीले रोबोटिक्स सफ्टवेयर विकासमा एनभिडियाको उपस्थितिलाई अझ विस्तार गर्छ । यसले चिप निर्माताको व्यापक रूपमा प्रयोग हुने कुडा सफ्टवेयर प्लेटफर्ममार्फत एआई कम्प्युटिङमा रहेको आफ्नो वर्चस्वलाई थप बलियो बनाउँछ ।

यूनिट्रीले शाङ्हाईको स्टार बोर्डमा सूचीकृत भई ४.२ अर्ब युआन जुटाउन खोजिरहेका बेला यो समाचार आएको हो । स्टक एक्सचेन्जले सोमबार यसको आईपीओ निवेदनको समीक्षा गर्ने कार्यतालिका छ ।

युनिट्रीले आफ्नो ४० प्रतिशतभन्दा बढी राजस्व चीन बाहिरका बजारहरूबाट आउने गरेको खुलासा गरेको छ ।

‘युनिट्रीको एच२ ह्युमनोइड रोबोटको अपग्रेड गरिएको संस्करण एच२ प्लस अक्टोबरमा उपलब्ध हुनेछ र यसलाई जोसुकैले किन्न सक्छन्,’ एनभिडियामा फिजिकल एआई सिमुलेशनका उपाध्यक्ष रेभ लेबारेडियनले भने ।

यो एउटा यस्तो कदम हो जसले ‘अत्याधुनिक ह्युमनोइड अनुसन्धानलाई विश्वका ठूला प्रविधि कम्पनीहरू र एआई युनिकर्नहरूको हातबाट मात्र बाहिर निकालेर प्रत्येक प्रयोगशालाको पहुँचमा पुर्याउनेछ,’ उनले भने ।

प्रेस विज्ञप्तिका अनुसार, कम्तीमा चारवटा अनुसन्धान संस्थाहरूले एच२ प्लस ह्युमनोइड प्रयोग गर्ने योजना बनाइसकेका छन् ।
यसमा सिएटलस्थित एआई२, स्विट्जरल्यान्डको ईटीएच जुरिच, स्ट्यानफोर्ड रोबोटिक्स सेन्टर र युसी सान डिएगोको एडभान्स्ड रोबोटिक्स एण्ड कन्ट्रोल ल्याबोरेटरी समावेश छन् । यसमा चीनमा रहेका कुनै पनि अनुसन्धान संस्थाहरू सूचीबद्ध गरिएका छैनन् ।

ह्युमनोइड रोबोटहरू अझै पनि सुरुवाती चरणको बजारको रूपमा रहेका छन् । युनिट्री र क्यालिफोर्नियास्थित १एक्स टेक्नोलोजी जस्ता कम्पनीहरूले बहुउद्देश्यीय रोबोटहरू विकास गरिरहेका भए पनि एआई–सञ्चालित ह्युमनोइडहरूको प्रयोग मुख्यतया गोदामहरूमा मात्र सीमित छ । सुरक्षा र गोपनीयता सम्बन्धी चिन्ताहरूले घरहरूमा यसको व्यापक प्रयोगमा अझै अवरोध पुर्याइरहेका छन् ।