भारतको नोयडामा तलब बढाउन माग गर्दै हिंस्रक विरोध प्रदर्शन

एजेन्सी । भारतको उत्तर प्रदेशमा रहेको नोयडाको फेज २ र सेक्टर ६० क्षेत्रमा सोमबार तलब वृद्धिको माग गर्दै कलकारखानाका मजदुरहरूले गरेको प्रदर्शन हिंसात्मक बनेपछि सवारी साधनहरूमा आगजनी, सम्पत्ति तोडफोड र ढुंगामुढा भएको प्रहरीले जनाएको छ ।

यस प्रदर्शनका कारण यातायात सेवा ठप्प भएको छ । यसले गर्दा बिहानको व्यस्त समयमा दिल्लीतर्फ जाने हजारौं यात्रुहरू विभिन्न सडकहरूमा अलपत्र परेका छन् । दिल्ली–नोयडा सीमामा सवारी साधनहरूको धेरै किलोमिटरसम्म लामो लाइन देखिएको थियो ।

अधिकारीहरूका अनुसार, विभिन्न औद्योगिक एकाइका ठूलो संख्यामा मजदुरहरू बिहानैदेखि आफ्नो लामो समयदेखिको तलब पुनरवलोकनको माग राख्दै भेला भएका थिए र प्रदर्शनका क्रममा नाराबाजी गरेका थिए ।

सेक्टर ६२, सेक्टर ८४ र मदरसन कम्पनीको एकाइमा पनि यस्तै प्रदर्शनहरू भएका रिपोर्टहरू प्राप्त भएका छन् । प्रदर्शनकारीहरूले राष्ट्रिय राजमार्ग ९ समेत अवरुद्ध गरेका छन् ।

यो प्रदर्शन चाँडै हिंसामा परिणत भयो । केही प्रदर्शनकारीहरूले सम्पत्ति तोडफोड गरे, ढुंगामुढा गरे र सवारी साधनहरूमा आगजनी गरे ।

गौतम बुद्ध नगर कमिश्नरेट अन्तर्गतका औद्योगिक क्षेत्रहरूमा पर्याप्त प्रहरी परिचालन सुनिश्चित गरिएको अधिकारीहरूले बताएका छन् ।

स्थितिको अनुगमन गर्न वरिष्ठ प्रहरी र प्रशासनिक अधिकारीहरू घटनास्थलमै उपस्थित छन् । अवस्था नियन्त्रणमा लिन प्रभावित क्षेत्रमा ठूलो संख्यामा प्रहरी बल पठाइएको उनीहरूले बताए ।

प्रहरीले एक विज्ञप्ति जारी गर्दै भनेको छ, ‘अवस्था नियन्त्रणमा छ र निरन्तर निगरानी भइरहेको छ । मजदुरहरूलाई सम्झाउने–बुझाउने र शान्ति कायम गर्ने प्रयास भइरहेको छ । शान्ति सुरक्षा कायम राख्न आवश्यक परेको ठाउँमा न्यूनतम बल प्रयोग गरिएको छ ।’

अधिकारीहरूले सर्वसाधारणलाई अफवाहको पछि नलाग्न अपिल गरेका छन् र प्रभावित क्षेत्रमा जनजीवन सामान्य बनाउने प्रयास भइरहेको आश्वासन दिएका छन् ।

उत्तर प्रदेश सरकारले गौतम बुद्ध नगरका मजदुरहरूका लागि अनिवार्य दोब्बर ओभरटाइम भुक्तानी र समयमै तलब दिने लगायतका श्रम कल्याणकारी कदमहरूको घोषणा गरेको भोलिपल्टै यो हिंसा भड्किएको हो ।

जिल्ला मजिस्ट्रेट मेधा रुपमले आइतबार औद्योगिक एकाइका प्रतिनिधिहरूसँग बैठक गर्दै मजदुरहरूको अधिकार संरक्षण गर्न महत्त्वपूर्ण निर्देशनहरू जारी गरेकी थिइन् ।

उनले काम जारी राख्न चाहने मजदुरहरूले कुनै पनि समस्या भोग्नु नपर्ने र व्यवस्थापनले सरकारी मापदण्ड अनुसार कर्मचारीहरूसँग संवाद जारी राख्नुपर्ने निर्देशन दिएकी थिइन् ।

उनले मजदुरहरूलाई बिना कटौती मानक दरको दोब्बर दरमा ओभरटाइम दिने र साप्ताहिक बिदाको अधिकार हुने घोषणा गरेकी थिइन् । आइतबार काम गरेमा दोब्बर ज्याला दिइनेछ भने नियम अनुसार बोनस पनि उपलब्ध गराइनेछ ।

प्रशासनले औद्योगिक एकाइहरूलाई कारखानाको गेटमा सीसीटीभी क्यामेराहरू सुचारु राख्न र मजदुरका गुनासोहरू सम्बोधन गर्न तथा शान्ति सुरक्षा कायम राख्न कन्ट्रोल रुम स्थापना गर्न पनि निर्देशन दिएको थियो ।

सोमबार दिल्लीका प्रमुख प्रवेश विन्दुहरूमा पनि सुरक्षा व्यवस्था कडा पारिएको थियो ।

प्रहरी स्रोतका अनुसार, नोएडालाई दिल्लीका विभिन्न भागसँग जोड्ने सबै सडकहरूमा र विशेषगरी उत्तर प्रदेशसँगका प्रमुख सीमा नाकाहरूमा अशान्ति फैलिन नदिन धेरै टोलीहरू परिचालन गरिएको छ ।

वरिष्ठ अधिकारीहरूले कडा निगरानी राखिएको र प्रदर्शनको आवरणमा कुनै पनि असामाजिक तत्त्व सहरमा प्रवेश नगरून् भन्नका लागि सवारी साधनहरूको गहन जाँच भइरहेको बताएका छन् ।

‘दिल्ली प्रहरी पूर्ण रूपमा सतर्क र सचेत छ । सबै रणनीतिक स्थानहरूमा पर्याप्त बल परिचालन गरिएको छ । कसैलाई पनि कानुन र व्यवस्था उल्लंघन गर्न दिइने छैन,’ एक वरिष्ठ प्रहरी अधिकारीले भने ।

प्रमुख सीमा नाकाहरूमा ब्यारिकेडिङलाई तीव्र पारिएको छ र कुनै पनि अप्रिय घटनाको तत्काल सामना गर्न द्रुत प्रतिक्रिया टोली र अर्धसैनिक बल लगायत थप कर्मचारीहरू खटाइएको छ ।

प्रहरी अधिकारीहरूले आफूहरूले स्थितिको अनुगमन गरिरहेको र उत्तर प्रदेशका समकक्षीहरूसँग सम्पर्कमा रहेको बताएका छन् ।