अमेरिकी जलसेनाका दुईवटा विध्वंसक जहाज हर्मुज पुगेको दाबीलाई इरानले गर्यो खण्डन

एजेन्सी । इरानको संयुक्त सैन्य कमान्डका प्रवक्ताले दुईवटा अमेरिकी जलसेनाका विध्वंसक जहाजहरूले हर्मुज जलयोजक पार गरेको अमेरिकी दाबीलाई खण्डन गरेका छन् ।

समाचार एजेन्सी एपीका अनुसार उनले थपेका छन्, ‘कुनै पनि जहाजको आवागमनको पहल इरानको इस्लामिक गणतन्त्रका सशस्त्र सेनाको हातमा रहन्छ ।’

पर्सियाली खाडीको साँघुरो मुखको रूपमा रहेको हर्मुज जलयोजकबाट कुनै समय विश्वमा व्यापार हुने कुल तेल र प्राकृतिक ग्यासको २० प्रतिशत हिस्सा ओसारपसार हुने गर्थ्यो ।

यसअघि, अमेरिकी सेनाले युद्ध सुरु भएदेखि पहिलोपटक माइन हटाउने कामको पूर्वसन्ध्यामा इरानको नियन्त्रणमा रहेको जलमार्गबाट दुईवटा विध्वंसक जहाजहरूले यात्रा गरेको बताएको थियो ।

यद्यपि, इरानी सरकारी सञ्चारमाध्यमले भने जलयोजक पार गर्न खोज्ने एक अमेरिकी सैन्य जहाजलाई इरानले फिर्ता हुन बाध्य पारेको बताएको छ ।

इरानको इस्लामिक रिभोलुसनरी गार्ड कर्प्स (आईआरजीसी) ले चेतावनी दिँदै हर्मुज जलयोजक पार गर्ने सैन्य जहाजहरूको कुनै पनि प्रयासको कडा जवाफ दिइने बताएको छ । इरानी सञ्चारमाध्यमले प्रसारण गरेको आईआरजीसीको विज्ञप्ति अनुसार, विशिष्ट नियमहरू अन्तर्गत गैर–सैन्य जहाजहरूलाई मात्र आवतजावत गर्न अनुमति दिइनेछ ।

वाशिङटन र तेहरानबीचको ६ हप्ता लामो युद्ध अन्त्य गर्न पाकिस्तानमा भएको शृंखलाबद्ध वार्तापछि आइतबार बिहान इरान सरकारले यस्तो जानकारी दिएको हो ।

सामाजिक सञ्जाल एक्समा एक पोस्ट गर्दै इरान सरकारले वार्ता सम्पन्न भएको र दुवै पक्षका प्राविधिक विज्ञहरूले कागजात आदानप्रदान गरेको बताएको छ ।

‘केही मतभेदहरू बाँकी रहँदा पनि वार्ता जारी रहनेछ,’ उक्त पोस्टमा थपिएको छ । यद्यपि, ती वार्ता कहिले पुनः सुरु हुनेछन् भन्नेबारे खुलाइएको छैन ।

मध्यस्थकर्ता पाकिस्तानको स्रोतका अनुसार, अमेरिकी उपराष्ट्रपति जेडी भ्यान्स, विशेषदूत स्टिभ विट्कोफ र राष्ट्रपति डोनल्ड ट्रम्पका ज्वाइँ जारेड कुश्नरले विश्राम लिनुअघि दुई घण्टासम्म इरानी संसदका सभामुख मोहम्मद बाकर कालीबाफ र विदेशमन्त्री अब्बास अराक्चीसँग भेटवार्ता गरेका थिए ।

इरानी प्रतिनिधिमण्डल शुक्रबार दिवंगत सर्वोच्च नेता आयातोल्लाह अली खामेनेई र युद्धमा मारिएका अन्यको शोकमा कालो पोशाक लगाएर आइपुगेको थियो । इरान सरकारका अनुसार, उनीहरूले सैन्य परिसर नजिकैको विद्यालयमा अमेरिकी बमबारीका क्रममा मारिएका केही विद्यार्थीका जुत्ता र झोलाहरू साथमा बोकेका थिए ।

पेन्टागनले उक्त हमला अनुसन्धानको क्रममा रहेको बताएको छ तर रोयटर्सले सैन्य अनुसन्धानकर्ताहरूको हवाला दिँदै उक्त हमलाका लागि अमेरिका नै जिम्मेवार हुन सक्ने उल्लेख गरेको छ ।