वन्यजन्तुको तस्बिर खिच्ने डग एलनको नेपालमा ट्रेकिङ गर्ने क्रममा मृत्यु

एजेन्सी । प्रख्यात वाइल्डलाइफ क्यामराम्यान र फोटोग्राफर डग एलनको नेपालमा पदयात्रा (ट्रेकिङ) गर्ने क्रममा निधन भएको छ ।

७४ वर्षीय एलन बीबीसीका विश्वप्रसिद्ध प्राकृतिक इतिहासका कार्यक्रमहरू द ब्लू प्लानेट, ब्लू प्लानेट २, प्लानेट अर्थ र फ्रोजन प्लानेटका मुख्य क्यामराम्यान थिए । उनले आफ्नो करियरको लामो समय सर डेभिड एटनबरोसँग मिलेर काम गरेका थिए ।

उनको व्यवस्थापन कम्पनीले एलनको निधन प्रकृतिको काखमा र साथीहरूको साथमा भएको जानकारी दिएको छ । जो सार्सबी म्यानेजमेन्टले उनलाई वाइल्डलाइफ फिल्म निर्माणका एक सच्चा अग्रगामीको रूपमा वर्णन गर्दै उनले प्राकृतिक संसारका सबैभन्दा लुकाउनै नसकिने र रोमाञ्चक दृश्यहरू कैद गरेको बताएको छ ।

उनले आफ्नो कामका लागि ८ वटा एमी अवार्ड र ५ वटा बाफ्टा अवार्ड जितेका थिए । सन् २०२४ मा उनलाई सञ्चारमाध्यम र वातावरणीय चेतनाका लागि पुर्याएको योगदानको कदर गर्दै ओबीईबाट सम्मानित गरिएको थियो ।

उनकी पूर्व पत्नी सु फ्लडले फेसबुकमा श्रद्धाञ्जली दिँदै भनेकी छन्, ‘उनी आफ्ना पुराना मित्रसँग साहसिक यात्रामा रहेकै बेला बितेको थाहा पाउँदा मनमा केही राहत मिलेको छ ।’

सन् १९५१ मा स्कटल्यान्डमा जन्मेका एलनले मरिन बायोलोजीमा स्नातक गरेपछि गोताखोरको रूपमा काम सुरु गरेका थिए ।

न् १९८१ मा अन्टार्कटिकामा सर डेभिड एटनबरोसँगको संयोगको भेटले उनको जीवनको मार्ग नै परिवर्तन गरिदियो ।

त्यसपछि उनले पृथ्वीका सबैभन्दा कठिन र चरम वातावरणमा छायांकन गर्न विज्ञता हासिल गरे ।

एलनले आफ्नो जीवनका करिब ६२० दिन ध्रुवीय भालुको खोजी र रेकर्डिङमा बिताएका थिए । उनले एकपटकको अनुभव सुनाउँदै भनेका थिए, कसरी एउटा ध्रुवीय भालु झ्यालको सिसामा नाक दलेर उनी भएकै ठाउँमा आएको थियो ।

अर्को एउटा घटनामा पानीमुनि छायांकन गरिरहेका बेला एउटा भोको वालरसले उनलाई सिल माछा ठानेर खुट्टामा समातेको थियो तर उनले आफ्नो क्यामेराले टाउकोमा हिर्काएर त्यसलाई भगाएका थिए ।

आफ्नो करियरको उत्तरार्धमा एलन वातावरणीय मुद्दाहरूमा सक्रिय अभियन्ता बनेका थिए । यसै वर्षको सुरुमा उनले स्कटिस सरकारलाई वातावरणीय क्षति पुर्याउने कम्पनीहरूलाई दण्डित गर्ने इकोसाइड विधेयकलाई समर्थन गर्न आग्रह गरेका थिए ।

उनको निधनले वाइल्डलाइफ फिल्म उद्योगमा ठूलो क्षति पुगेको छ । उनले छोडेका दृश्यहरूले विश्वभरका दर्शकहरूलाई हाम्रो ग्रहको रक्षा गर्न र यसका आश्चर्यहरू बुझ्न सधैं प्रेरित गरिरहनेछन् ।