युद्धविराम भए पनि यूएईमा क्षेप्यास्त्र प्रहार भएको दाबी, प्रतिरक्षा प्रणाली सक्रिय

एजेन्सी । यूएईको राष्ट्रिय संकट तथा आपतकालीन व्यवस्थापन प्राधिकरणले बुधबार एउटा चेतावनी जारी गर्दै वायु रक्षा प्रणालीले हाल मिसाइल खतराको सामना गरिरहेको जनाएको छ ।

स्थानीय बासिन्दाहरूलाई सुरक्षित रहन सल्लाह दिइएको छ । युद्धविराम भएको केही घण्टापछि यस्तो चेतावनी जारी भएको छ । अमेरिकाका राष्ट्रपति डोनल्ड ट्रम्पले पूर्ण र समग्र विजय घोषणा गरेको केही घण्टा पछि पनि मिसाइलहरू आएका छन् । मध्यपूर्वको स्वर्ण युग सुरु भएको केही घण्टा पछि पनि आक्रमण जारी छ ।

यूएईको रक्षा मन्त्रालयले रिपोर्ट गरेअनुसार, फेब्रुअरी २८ मा युद्ध सुरु भएदेखि इमिरेट्सले ५२० वटा ब्यालिस्टिक मिसाइल, २६ वटा क्रुज मिसाइल र २२ सय २१ वटा मानवरहित हवाई वाहन (ड्रोन) हरूलाई विफल पारेको छ ।

यो भनेको एक करोड जनसंख्या भएको देशलाई लक्षित गरी प्रहार गरिएका २७ सय ६७ वटा क्षेप्यास्त्रहरू हुन् । र यी आक्रमणहरूलाई विफल पार्ने काम अझै जारी छ । प्राधिकरणको चेतावनी अहिले पनि सक्रिय छ ।

कुवेतले आज पूरै युद्धकै सबैभन्दा भारी इरानी रिभोलुसनरी गार्ड कोरका आक्रमणहरू झेलिरहेको छ । युद्धविराम घोषणा भएपछि बहराइनको बाप्को तेल भण्डारण केन्द्रमा ड्रोन आक्रमणबाट आगो लागेको छ । साउदी वायु रक्षा प्रणालीहरू रस तनुरा, प्रिन्स सुल्तान एयर बेस र शैबाह तेल क्षेत्रमा सक्रिय भएका छन् । कतारले पनि आउँदै गरेका मिसाइलहरूलाई विफल पारेको छ ।

इजरायलमा इरानी ब्यालिस्टिक मिसाइलबाट निस्किएका क्लस्टर हतियारहरूले बीर्शेवामा प्रहार गरे जसमा दुई किशोरहरू घाइते भएका छन् । युद्धविराम सुरु हुँदा यीमध्ये केही पनि रोकिएन । र अहिलेसम्म पनि केही रोकिएको छैन ।

खाडी मुलुकहरूले बदला लिइरहेका छैनन् । उनीहरूले केवल आक्रमणहरूलाई विफल पारिरहेका छन् । थाड र पेट्रियट ब्याट्रीहरूले आफ्नो गोलाबारुदको भण्डार रित्याउँदै ती आक्रमणहरूलाई झेलिरहेका छन् जुन आक्रमणहरू मोजाइक डिफेन्स अन्तर्गत स्वायत्त रूपमा काम गर्ने आईआरजीसीका प्रान्तीय कमान्डहरूले गरिरहेका छन् र उनीहरूले तेहरानबाट न त कुनै युद्ध रोक्ने आदेश पाएका छन्, न त उनीहरूलाई त्यसको आवश्यकता नै छ ।

युद्धविराममा राजधानीको राजनीतिक नेतृत्वले हस्ताक्षर गरेको हो । तर, मिसाइलहरू प्रान्तका सैन्य एकाइहरूले प्रहार गरिरहेका छन् ।

यी दुई प्रणालीहरू एउटै चेन अफ कमान्ड मार्फत सञ्चार गर्दैनन् र ठ्याक्कै यसै कारणले गर्दा मिसाइलहरू आउने क्रम जारी छ ।

भर्खरै युद्धविराममा हस्ताक्षर गरेर सरकारी टेलिभिजनमा विजयको घोषणा गरेको शासनबाट ६ वटा मित्र राष्ट्रहरू अहिले पनि सक्रिय आक्रमणको चपेटामा छन् । कूटनीतिक स्तरमा सम्झौता स्वीकार गर्ने शासन र परिचालन स्तरमा मिसाइल प्रहार गर्ने निर्णय नियन्त्रण गर्ने निकाय एउटै होइनन् ।

सर्वोच्च राष्ट्रिय सुरक्षा परिषद् मार्फत युद्धविरामलाई अनुमोदन गर्ने आईआरजीसी सैन्य परिषद्सँग ३१ वटा स्वायत्त प्रान्तीय कमान्डहरूलाई तत्कालै रोक्न सक्ने कुनै किल स्विच छैन । मोजाइक डिफेन्स ठ्याक्कै यसै परिदृश्यका लागि डिजाइन गरिएको थियो जसमा माथिल्लो तहमा राजनीतिक सम्झौताहरू र तल्लो तहमा परिचालनको निरन्तरता रहन्छ ।

ट्रम्पले एएफपीलाई बताएअनुसार, यो नतिजा पूर्ण र समग्र विजय हो, शतप्रतिशत, यसमा कुनै शंका छैन । प्रत्यक्ष अमेरिका–इरान द्वन्द्वको परिप्रेक्ष्यबाट हेर्दा यो कुरा तर्कसंगत लाग्न सक्छ ।

सैन्य अभियानले हतियार–रसायन क्षमताको ८५ प्रतिशत नष्ट गर्यो, १३० वटा वायु रक्षा प्रणालीहरू ध्वस्त पा¥यो र इरानलाई वार्ताको टेबुलमा आउन बाध्य बनायो ।

तर अबु धाबीको परिप्रेक्ष्यबाट हेर्दा, प्राधिकरणको चेतावनी अहिले पनि सक्रिय छ । त्यहाँ विजयको स्वरूप अर्कै देखिन्छ । यो यस्तो युद्धविराम जस्तो देखिन्छ जसले अमेरिकी बमहरूलाई त रोक्यो, तर इरानी बमहरूलाई रोकेन ।

खाडी मुलुकहरूले यस्तो सम्झौताको मूल्य चुकाइरहेका छन् जसको वार्ता उनीहरूले गरेका थिएनन् । उनीहरूले यस्तो शासनको आक्रमण झेलिरहेका छन् जसको विरुद्ध उनीहरूले बदला लिन सक्दैनन् ।

उनीहरूले आफ्ना रक्षा प्रणालीहरू रित्याउँदै मिसाइलहरू रोकिरहेका छन् जसलाई तुरुन्तै प्रतिस्थापन गर्न सम्भव छैन र उनीहरूले आफ्नै वायु रक्षा प्रणालीले प्रदान गरेको सुरक्षा छाता मुनिबाट जाने जहाजहरूबाट हर्मुजको टोल बुथमा इरानले युआन (चिनियाँ मुद्रा) संकलन गरिरहेको टुलुटुलु हेरिरहनु परेको छ ।

यो युद्धविराम वाशिङटनका लागि वास्तविक हो । यो तेहरानका लागि पनि वास्तविक हो । तर यो दुबई, कुवेत सिटी, मनामा वा रियादका लागि वास्तविक होइन ।

प्राधिकरणको चेतावनी अझै सक्रिय छ । स्वर्ण युग अझै आएको छैन ।