इरानका पावर प्लान्ट ध्वस्त पार्ने ट्रम्पको धम्कीपछि एसियाली सेयर बजारमा पहिरो

एजेन्सी । हर्मुज जलयोजक पुनः नखुलुन्जेल इरानका पावर प्लान्टहरूलाई नामेट पार्ने भनी अमेरिकाका राष्ट्रपति डोनल्ड ट्रम्पले दिएको धम्कीले सोमबार विश्वव्यापी सेयर बजारमा ठूलो धक्का दिएको छ ।

हप्ताको सुरुवातमै एसिया–प्रशान्त क्षेत्रका बजारहरूमा सेयर बिक्रीको लहर चलेको छ । दिउँसोको कारोबारमा जापानको निक्केई ३.४ प्रतिशतले घटेको छ भने चीनको सीएसआई ३०० २.८ प्रतिशत र दक्षिण कोरियाको कोस्पी सूचकांक ६.५ प्रतिशतले ओरालो लागेको छ ।

यसैबीच, लगानीकर्ताहरूले सुरक्षित विकल्प खोज्दा आज अमेरिकी डलरको भाउ बढिरहेको छ ।

ट्रम्पको अल्टिमेटम र त्यसको जवाफमा पश्चिम एसियाका अत्यावश्यक पूर्वाधारहरूलाई अपरिवर्तनीय रूपमा नष्ट गर्ने तेहरानको धम्कीले युद्ध तनाव वृद्धिको नयाँ चरणमा प्रवेश गरिरहेको विश्लेषकहरूले चेतावनी दिएका छन् ।

ऊर्जा बजारमा पर्न सक्ने दीर्घकालीन प्रभावको गम्भीरताप्रति अन्ततः बजार सचेत हुन थालेको साक्सो यूकेका लगानी रणनीतिकार नील विल्सनले बताएका छन् ।

यो तनाव वृद्धिको यस्तो एउटा दुष्चक्र वा तनावको जाल हो जसबाट बाहिर निस्कने हाल कुनै वास्तविक बाटो देखिँदैन । पछि हट्दा लाग्ने लागत दिनप्रतिदिन बढ्दै गएकाले कुनै पनि पक्ष पछि हट्न इच्छुक देखिएका छैनन् । अझ कडा दबाब दिएमा मात्र अर्को पक्ष पछि हट्न बाध्य हुने प्रत्येक पक्षलाई लाग्छ ।

द्वन्द्व बढ्ने डरका साथै लगानीकर्ताहरू यस वर्ष ब्याजदरमा हुन सक्ने वृद्धिको लागि पनि तयार भइरहेका छन् किनकि केन्द्रीय बैंकहरूमाथि बढ्दो मुद्रास्फीति नियन्त्रण गर्न ठूलो दबाब छ ।