एजेन्सी । एजेन्स फ्रान्स–प्रेस (एएफपी) का अनुसार इरानको रिभोलुसनरी गार्ड्सले बुधबार तेल र ग्यासका लागि महत्त्वपूर्ण ढुवानी मार्ग हर्मुज जलसंयोजक आफ्नो नियन्त्रणमा रहेको र उक्त जलमार्गबाट जान खोज्ने कुनै पनि जहाजले मिसाइल वा भौंतारिरहेका ड्रोनबाट हुने क्षतिको जोखिम सामना गर्नुपर्ने बताएको छ ।
‘हाल हर्मुज जलसंयोजक इस्लामिक गणतन्त्रको जलसेनाको पूर्ण नियन्त्रणमा छ,’ फार्स समाचार एजेन्सीद्वारा जारी एक विज्ञप्तिमा गार्ड्स जलसेनाका अधिकारी मोहम्मद अकबरजादेहले भने ।
यद्यपि, अमेरिकी सेन्ट्रल कमान्डका एडमिरल ब्राड कुपरले इरानको दाबीलाई खण्डन गर्दै, केही घण्टा अघि मात्र अमेरिकाले सम्पूर्ण इरानी जलसेनालाई डुबाउँदै गरेको र १७ वटा इरानी जहाजहरू पहिले नै नष्ट गरिसकेको बताएका थिए ।
‘दशकौंदेखि इरानी शासनले अन्तर्राष्ट्रिय ढुवानीलाई दुःख दिँदै आएको छ । आज अरब खाडी, हर्मुज जलसंयोजक वा ओमानको खाडीमा एउटा पनि इरानी जहाज चलिरहेको छैन,’ उनले भने ।
युद्धका कारण बढेको ऊर्जाको आकाशिँदो मूल्यलाई नियन्त्रण गर्ने प्रशासनको अहिलेसम्मकै सबैभन्दा आक्रामक कदमको रूपमा राष्ट्रपति डोनल्ड ट्रम्पले आवश्यक परेमा अमेरिकी जलसेनाले हर्मुज जलसंयोजकबाट तेल ट्यांकरहरूलाई सुरक्षा दिएर लैजान सक्ने मंगलबार बताएका छन् ।
आफ्नो ब्रिफिङमा एडमिरल कुपरले शनिबार इरानविरुद्धको युद्धको पहिलो २४ घण्टामा गरिएको आक्रमणको संख्या सन् २००३ मा इराकमा गरिएको शक–एन्ड–अ आक्रमणको तुलनामा झण्डै दोब्बर थियो र इरानमा अहिलेसम्म करिब २ हजार लक्ष्यहरूमा प्रहार गरिएको छ ।
प्रतिक्रिया