नेपाल स्काउटले खड्का ल्याण्डलाई भन्यो : ७ दिनभित्र बहालको रकम तिर्नु, नभए सबै जफत हुन्छ

काठमाडौं । युवा तथा खेलकुद मन्त्रालयअन्तर्गतको नेपाल स्काउट राष्ट्रिय प्रधान कार्यालयले खड्का ल्याण्ड डेभलपमेन्ट प्रालिको नाममा सूचना जारी गर्दै सात दिनभित्र बहालको बक्यौता रकम तिर्न ताकेदा गरेको छ ।

स्काउटले तोकिएको सात दिनभित्र बक्यौता रकम उपलब्ध नगराइए स्काउटको जग्गामा निर्माण भएको सम्पूर्ण भवन तथा सामान जफ्त गरिने सूचनामा उल्लेख गरेको छ । भवन र सामान जफ्तबाट नपुग भएको रकम खड्का ल्याण्ड प्रालिको घरघराना वा जायजेथाबाट असुल उपर गर्ने सूचनामा उल्लेख गरेको छ ।

आज प्रकाशित स्काउटको सार्वजनिक सूचना अनुसार स्काउटको जग्गा र त्यहाँका संरचना खड्का ल्याण्ड डेभलपमेन्ट प्रालिले भाडामा सञ्चालन गर्दै आएको छ । तर भाडा चुक्ता नगर्दा स्काउटलाई अपूरणीय क्षति पुगेको उल्लेख छ । त्यसैले सात दिनभित्र बहालको बक्यौता रकम तिर्न अन्तिम मौका प्रदान गरिएको सूचनामा उल्लेख छ ।

सूचनामा लेखिएको छ, ‘उक्त समयावधिभित्र बहाल तिर्न नआए नेपाल स्काउट र त्यस खड्का ल्याण्ड डेभलपमेन्ट प्रालिबीच भएको सम्झौताको बुँदा नं. ४ बमोजिम र मुलकको देवानी संहिता २०७४ को परिच्छेद १२ दफा ६१९, ६२० ९४० र ६२१ बमोजिम जग्गामा निर्माण भएका सम्पूर्ण भवन तथा सामानहरु जफत गरिने र उक्त जफतबाट समेत नपुग हुन आउने रकम घरघराना वा जायजेथाबाट असुल उपर गर्ने व्यहोरा समेत सूचित गरिन्छ ।’

स्काउटको जग्गा कांग्रेस नेता एवम् पूर्व ऊर्जामन्त्री दीपक खड्काको कम्पनी खड्का ल्याण्ड प्रालिले कब्जा गर्दै आएको आरोप लाग्दै आएको छ ।