काठमाडौं । ऊर्जा सवारी निर्माता बिवाईडीले आफ्नो मुख्यालय सेनझेनमा डिपाईलट एडभान्स्ड इन्टेलिजेन्ट ड्राइभिङ असिस्टेन्स सिस्टम (डिपाईलट सिस्टम) सार्वजनिक गरेको छ ।
डिपाईलट ६००, डिपाईलट ३०० र डिपाईलट १०० सहितको यो सिस्टमले सबै ग्राहकहरूका लागि उच्चस्तरीय स्मार्ट ड्राइभिङ प्रविधिलाई सहज बनाउन बीवाईडीको प्रतिबद्धता देखाएको छ । यसले सवारी उद्योगको प्रविधिगत रूपान्तरणलाई निकै तीव्र बनाउँने कम्पनीको दाबी छ ।
बिवाईडीले भने यो सुविधा आफ्ना सबै मोडलमा विना कुनै अतिरिक्त शुल्क दिने जनाएको छ । सबैभन्दा कम मुल्यको मोडल सिगलमा समेत यो सुविधा उपलब्ध हुनेछ, जसको मूल्य ९ हजार ५ सय ५५ डलर मात्र रहेको छ । कम्पनीले नयाँ प्रविधिसँगै ग्राहकहरूलाई सुरक्षित र स्मार्ट ड्राइभिङ अनुभव प्रदान गर्ने लक्ष्य राखेको छ । अहिलेसम्म सेन्सर र क्यामेरा जस्ता उच्च प्रविधि भएका सेल्फ ड्राइभिङ सिस्टमहरू महँगा गाडीहरूमा मात्र उपलब्ध हुने गरेको थियो तर बिवाईडी ले अब यो परिवर्तन गर्दै यस्ता प्रविधि केबल महँगा गाडीहरूमा सीमित नराखी सबैलाई सहज रूपमा उपलब्ध गराउने छ । ‘राम्रो प्रविधिमा सबैको पहुँचमा हुनु पर्छ,’ बिवाईडीका सिईओ वाङ छुवान्फुलले भने ।
डिपाईलट सिस्टम तीन भिन्न संस्करणहरूमा उपलब्ध छ । डिपाईलट ६०० मा तीनवटा लिडार छन्, जसलाई मुख्यतः याङवाङ मोडेलहरुमा प्रयोग गरिनेछ । डिपाईलट ३०० मा एउटा लिडार छ, जुन मुख्य रूपमा डेन्जा र केही बिवाईडी मोडेलहरूमा प्रयोग गरिनेछ । त्यस्तै, डिपाईलट १०० मा तीनवटा क्यामेरा छन्, जुन बिवाईडीका विभिन्न मोडेलहरूमा प्रयोग गरिनेछ ।
विशेष गरी डिपाईलट १०० मा फ्रन्ट-फेसिङ तीन क्यामेरा सेन्सिङ हार्डवेयर र एन्ड-टु-एन्ड कन्ट्रोल एल्गोरिदम समावेश छ, जसले प्रविधि, सेन्सर, एल्गोरिदम, र डेटा क्षेत्रमा ठूलो प्रगति देखाउँछ । यसले ग्राहकहरूलाई सबैभन्दा आवश्यक पर्ने सुविधाहरू प्रदान गर्छ । राजमार्ग र शहरी एक्सप्रेसवेहरूमा, हाई स्पिड नेभिगेसन अन अटोपाईलट प्रणालीले नेभिगेसन मार्ग पछ्याएर र्याम्पबाट प्रवेश वा निकास गर्ने, लेन ठीक राख्ने, स्थिर गतिमा चल्ने, आफै लेन परिवर्तन गर्ने, र केही अवरोधहरू छलेर अगाडि बढ्ने जस्ता कामहरू पूरा गर्न सक्छ ।
यसका साथै, अटोमेटेड भ्याले पार्किङ प्रणालीले ड्रप-अफ र गो, गाडी लक गरेपछि आफै पार्क हुने जस्ता सुविधाहरू प्रदान गर्छ । यो प्रणाली प्रयोगकर्ताको पार्किङ बानीहरू र विभिन्न ड्राइभिङ परिस्थितिहरूअनुसार काम गर्न सक्छ, जसले पार्किङलाई अझ सहज बनाउँछ ।
मेमोरी नेभिगेसन अन अटोपाईलट प्रणाली दैनिक यात्रा वा अफिस आउने-जाने जस्ता उच्च-प्रयोग मार्गहरूका लागि उपयुक्त छ । यसले ट्राफिक बत्तीमा आफै रोक्ने र अघि बढ्ने, जटिल मोडहरू पार गर्ने, स्वचालित ओभरटेक गर्ने, कुनै पनि परिस्थितिमा अवरोध छलेर अघि बढ्ने, र लेन परिवर्तन गर्न सम्झौतासहित निर्णय गर्ने जस्ता सुविधाहरू प्रदान गर्छ । बिवाईडीले ग्राहकहरूलाई सबैभन्दा महत्वपूर्ण लाग्ने ड्राइभिङ परिस्थितिहरूमा केन्द्रित गर्दै सुरक्षा, आराम, र सहजता प्रदान गर्ने लक्ष्य राखेको छ, ताकि हरेक व्यक्तिले बीवाईडीको प्रविधिको फाइदा उठाउन सकून् ।
डिपाईलट सिस्टमले ग्राहकहरूको सुरक्षा निकै बढाउन सक्छ । डिपाईलट १०० ले १ किमीसम्म विना कुनै म्यानुअल हस्तक्षेप स्वचालित रूपमा यात्रा गर्न सक्छ। यसको अटोमेटिक एमरजेन्सि ब्रकिङ्ग (ब्भ्द्य) प्रणालीले १०० किमि प्रति घण्टासम्म गाडीलाई भरपर्दो रूपमा रोक्न सक्छ, र भविष्यमा १२० किमि प्रति घण्टा र १४० किमि प्रति घण्टा सम्मको गति सम्हाल्ने योजना छ। ब्ख्ए प्रणालीको सफलता दर ९९% रहेको छ, जसले आपतकालीन अवस्थाहरूमा छिटो निर्णय गरेर दुर्घटना हुनबाट बचाउन मद्दत गर्छ।
बिवाईडीसँग ५ हजारभन्दा बढी इन्जिनियरहरू यो क्षेत्रमा काम गरिरहेका छन ।
विश्वकै अग्रणी नयाँ ऊर्जा सवारी निर्माताको रूपमा, बिवाईडीले ‘सुखद जीवनका लागि प्रविधिगत नवप्रवर्तन’ लाई आफ्नो मूल सिद्धान्त बनाएको छ । डिपाईलट इन्टेलिजेन्स रणनीति मार्फत बिवाईडी, नयाँ ऊर्जा सवारीहरूको विकासलाई अगाडि बढाउँदै विश्वभरको अटोमोबाइल उद्योगलाई रूपान्तरण गर्न र सुरक्षित तथा दिगो यातायात समाधानहरू प्रदान गर्न प्रतिबद्ध रहेको बताएको छ ।
प्रतिक्रिया