ऊर्जामन्त्री दीपक खड्कामाथि मन्त्रालयमै कसले गर्यो हातपात ?
काठमाडौं । ऊर्जा, जलस्रोत तथा सिंचाई मन्त्री दीपक खड्कामाथि मन्त्रालयमा नै हातपात भएको छ । शुक्रबार मन्त्रीमाथि हातपात भएको हो ।
शुक्रबार पूर्वप्रधानमन्त्री तथा नेपाली कांग्रेसका सभापति शेरबहादुर देउवा निवासमा वर्तमान सरकारमा सहभागी कांग्रेसका मन्त्रीहरुसँगको छलफलका क्रममा खड्काले घटनाबारे जानकारी गराएका हुन् ।
छलफलका क्रममा मन्त्री खड्काले सुरक्षाको विषय उठाएर आफूमाथि मन्त्रालयमै दुर्व्यवहार भएको बताएका बैठकमा सहभागी एक मन्त्रीले जानकारी दिए ।
कांग्रेस बैठकमा सहभागी गृहमन्त्री रमेश लेखकले घटनाबारे आफूलाई कसैले जानकारी नगराएको जनाएका थिए ।
मन्त्री खड्का कार्यकक्षबाट निस्कँदै गर्दा गोरखाका हरि पोखरेलले हातपात गरेको खुलेको छ । मन्त्रीलाई पत्रकार भन्दै उनी भेट्न पुगेका थिए ।
मन्त्रीले भेट्न नमाने पनि धेरै पटकको अनुरोधपछि उनलाई भेट्न दिइएको थियो । ऊर्जामन्त्री खड्काले आफूसँग भेट्न आएका पोखरेललाई नचिनेको बताएका थिए । त्यसपछि पोखरेलले ‘मलाई नचिन्नी’ भन्दै मन्त्रीमाथि हातपात गरेका थिए ।
‘मन्त्रीमाथि मलाई नचिन्ने भन्दै दुर्व्यहार र हात हाल्ने स्थिति बनेपछि उनलाई तत्कालै नियन्त्रणमा लिइएर प्रहरीको जिम्मा लगाइएको थियो,’ स्रोतले भन्यो ।
मन्त्रीमाथि हातपात परेपछि सुरक्षाकर्मीले उनलाई तत्कालै नियन्त्रणमा लिएका थिए ।
उनलाई सिंहदरबारको सुरक्षाकर्मीको जिम्मा लगाएको थियो । एक दिन प्रहरीको नियन्त्रणमा रहेका उनलाई मन्त्री खड्काको निर्देशनमा छाडिएको थियो ।
मन्त्री खड्कामाथि हातपात गर्ने व्यक्ति गोरखाको अजिरकोट गाउँपालिका-५, मुच्चोकका हरि पोखरेल रहेको स्रोतको भनाइ छ । उनी गत निर्वाचनमा गोरखाबाट गण्डकी प्रदेशसभा सदस्यको उम्मेदवारसमेत रहेका थिए । उनी गोरखाको निर्वाचन क्षेत्र २(ख) बाट प्रदेशसभामा स्वतन्त्र उम्मेदवार बनेका थिए ।
उनी नेपाल टेलिभिजनको कार्ड बोकेर सिंहदरबार प्रवेश गरेको पाइएको छ ।
क्लिकमान्डु
