गौसको कीर्तिमानी शतकमा पोखरा विजयी, लुम्बिनीविरूद्ध एनपीएलकै ठूलो जित

काठमाडौं । ओपनर आन्द्रेस गौसले कीर्तिमानी शतक प्रहार गर्दा पोखरा एभेन्जर्सले नेपाल प्रिमियर लिग (एनपीएल) मा सहज जित निकालेको छ ।

शुक्रबार भएको खेलमा पोखराले लुम्बिनी लायन्समाथि १० विकेटको सहज जित निकालेको हो ।

त्रिवि क्रिकेट मैदानमा लुम्बिनीले दिएको १७१ रनको लक्ष्य पछ्याएको पोखराले १६ ओभर ५ बलमा विना विकेटको क्षतिमा लक्ष्य पूरा गरेको हो ।

पोखराका लागि गौसले ५५ बलमा १२ चौका र ५ चक्का प्रहार गर्दै १०४ रन बनाए । गौस एनपीएलमा शतक बनाउने पहिलो खेलाडी हुन् । यसअघि आजकै खेलमा लुम्बिनीका रोहित पौडेलले सर्वाधिक ९५ रन बनाएका थिए ।

त्यसअघि टस जितेर पहिले ब्याटिङ गरेको लुम्बिनीले निर्धारित २० ओभरमा ५ विकेट गुमाउँदै १७० रन बनाएको थियो । लुम्बिनीका लागि कप्तान रोहित पौडेलले कीर्तिमानी ९५ रनको योगदान गरे ।

उनले ५९ बलमा १० चौका र ४ छक्का प्रहार गरे । लुम्बिनीका लागि टोम मोरेसले ४५ रनको योगदान गर्दा सन्दीप जोराले १८ रन जोडे । बलिङतर्फ पोखराका लागि विपिन खत्रिले दुई विकेट लिए ।

आजको जितसँगै पोखराले तीन खेलमा २ अंक जोडेको छ । यता लुम्बिनीको यो लगातार दोस्रो हार हो ।