चीनको छेन्दु पुगिन् परराष्ट्रमन्त्री राणा, भेटवार्ताको तयारी

काठमाडौं । परराष्ट्रमन्त्री डा. आरजु राणा देउवा चीनको छेन्दु पुगेकी छन् ।

चिनियाँ विदेशमन्त्री वाङ यीको मैत्रीपूर्ण निमन्त्रणामा औपचारिक भ्रमणका लागि बिहीबार उनी नेपाली प्रतिनिधिमण्डलको नेतृत्व गर्दै चीन प्रस्थान गरेकी हुन् । परराष्ट्रमन्त्री राणा बिहीबार छेन्दु पुगेसँगै भोलिका लागि चीनस्थित नेपाली दूतावासको टोलीले उनको भेटवार्ताको तयारी गरेको छ ।

मन्त्री राणालाई छेन्दुमा चीनको विदेश मन्त्रालयको सिचुआन प्रान्तीय डेपुटी डाइरेक्टर जनरल लि हुछियाङ र चीनका लागि नेपाली राजदूत डा कृष्णप्रसाद ओलीले स्वागत गरेका थिए ।

यस भ्रमणका क्रममा मन्त्री राणाले चिनियाँ विदेशमन्त्री वाङ यीसँग द्विपक्षीय भेटवार्ता गर्नेछिन् । उक्त भेटवार्ता शुक्रबार चीनको छेन्दु सहरमा हुनेछ ।

चीनको औपचारिक भ्रमणका साथै प्रधानमन्त्री केपी शर्मा ओलीको आसन्न चीन भ्रमणको तयारीस्वरुप परराष्ट्रमन्त्री चीन प्रस्थान गरेको बताइएको छ ।