अमेरिकामा दुर्घटनाबाट दुई नेपालीको मृत्यु, दुई जना घाइते

काठमाडौं । अमेरिकामा बस्दैआएका दुई नेपाली युवाहरुको कार दुर्घटनामा मृत्यु भएको छ । दुई जना घाइते भएका छन् । शनिबारको दुर्घटनामा रुकुमका सुरेश केसी र बर्दियाका विवेक सुवेदीको मृत्यु भएको हो ।

अमेरिकाको भर्जिनिया राज्यस्थित चान्टिलीमा भएको कार दुर्घटनामा मृत्यु हुने रुकुम आठबिसकोट नगरपालिकाका केसी केही महिनाअघि मात्रै अमेरिका प्रवेश गरेका थिए ।

दुर्घटनामा कार चालक नेपाली युवा विजय तामाङलाई प्रहरीले नियन्त्रणमा लिएको छ । दुर्घटनामा चालक तामाङ र उनीसँगै रहेका अर्का नेपाली युवा मोहन श्रेष्ठ पनि घाइते छन् । कार तीब्र गतिमा रहेको र चालकले मदिरा सेवन गरेको प्रहरीले बताएको छ ।

प्रहरीले चालकको लापरबाहीका कारण दुर्घटना भएको जनाएको छ । चालक तामाङ र श्रेष्ठको स्वास्थ्य अवस्था भने स्थिर रहेको बताइएको छ । दुर्घटनापछि प्रहरी चालक तामाङलाई नियन्त्रणमा लिए थप अनुसन्धान गरिरहेको छ ।