बैतडीबाट तीन वर्षमा २४३ महिला र बालबालिका हराए

बैतडी । भारतसँग सीमा जोडिएको बैतडी जिल्लाबाट महिला तथा बालबालिका हराउने क्रम बढ्दै गएको छ । गएको तीन वर्षको तथ्याङ्क हेर्दा हरेक वर्ष हराउने महिला तथा बालबालिकाको सङ्ख्या बढ्दै गएको हो । 

तीन वर्षमा यहाँबाट करिब साढे २ सय महिला तथा बालबालिका हराएको जिल्ला प्रहरी कार्यालय बैतडीले जनाएको छ । बैतडीका प्रहरी प्रवक्ता, प्रहरी निरीक्षक लोकराज जोशीका अनुसार आर्थिक वर्ष २०७७/७८ देखि आर्थिक वर्ष २०७९/८० सम्म यहाँ २ सय ४३ महिला तथा बालबालिका हराएका छन् ।

जिल्ला प्रहरी कार्यालयको तथ्याङ्कअनुसार आर्थिक वर्ष २०७७/७८ मा ६०, आव २०७८/७९ मा ७८ र गत आव २०७९/८० मा १०५ जना हराएका छन् । हराउनेमा सबैभन्दा बढी महिला रहेको जिल्ला प्रहरी कार्यालयले जनाएको छ ।

हराएकामध्ये केही फेला पर्ने गरेका भए पनि आधाजसो अझै सम्पर्कविहीन रहेको प्रवक्ता जोशीले बताए । गत आर्थिक वर्षमा १०५ जनाको खोजीका लागि प्रहरीमा निवेदन आएकोमा ५५ जना फेला परेका छन् । उक्त वर्ष ७२ महिला, २१ बालिका, १० बालक र दुई ज्येष्ठ नागरिक हराएका थिए । हराएकामध्ये ३३ महिला, १२ बालिका, नौ बालक र एक ज्येष्ठ नागरिक फेला परेका हुन् ।

यस्तै आर्थिक वर्ष २०७८/७९ मा ४० महिला, २६ बालिका र १२ बालक हराएका थिए । तीमध्ये २३ महिला, १६ बालिका र छ बालक मात्रै फेला परेका छन् । दुई वर्षको अवधिमा हराएकामध्ये १ सय जना फेला परेका छन् भने ८३ जना अझै हराइरहेका प्रहरी निरीक्षक जोशीले बताए । यसका साथै आव २०७७/७८ मा  हराएका ६० जनामध्ये ३९ मात्रै फेला परेका र अरु सम्पर्कविहीन रहेको प्रहरीले जनाएको छ ।

हराउने महिला तथा बालबालिकामध्ये केही प्रहरीको सक्रियतामा भेटिन्छन् भने केही आफन्तकै पहलमा भेटिने गरेका छन् । धेरैजसो भागेर भारत जाने र उतै काम गर्ने भएकाले उनीहरू फेला नपर्ने अवस्था रहेको प्रहरीको भनाइ छ ।

घरेलु हिंसा, उमेर नपुग्दै प्रेम गर्ने र भागी विवाह गर्ने लगायतका कारणले महिला हराउने गरेको बैतडीका प्रहरी प्रमुख, प्रहरी नायब उपरीक्षक प्रेमबहादुर शाहीले जानकारी दिए ।

उनले भने, ‘मोबाइल र सामाजिक सञ्जालको दुरूपयोगले पनि पछिल्लो समय यस्ता घटना बाहिर आइरहेका छन् । उमेर नपुगी बिहे गर्ने र घरपरिवारलाई जानकारी नै नदिने कारणले महिला बढी हराएका घटना देखिएका हुन् ।’

भागी बिहे गरेको धेरै वर्षसम्म पनि घरपरिवारको सम्पर्कमा समेत नआउने गरेका छन् । सीमा नाकामा पनि प्रहरीले शङ्कास्पद व्यक्तिलाई सोधपुछ गर्ने गरेको छ ।