संकटका बीच पनि अर्थतन्त्रमा आशाको किरण देखियो: अध्यक्ष ढकाल

बागलुङ । नेपाल उद्योग वाणिज्य महासंघका अध्यक्ष चन्द्रप्रसाद ढकालले मुलुकको संकटग्रस्त अर्थतन्त्रमा विस्तारै आशाको किरण देखिन थालेको बताएका छन् ।

बागलुङ उद्योग वाणिज्य संघको ५९औँ वार्षिक साधारणसभामा उनले पछिल्लो समय विप्रेषण र पर्यटक आगमनमा उल्लेख्य वृद्धि आएको बताए । ‘विप्रेषण २५ प्रतिशतले बढेको छ, बैंकको सिडी रेसियो पनि ८५.८६ प्रतिशत छ, ब्याजदर घट्दो क्रममा छ,’ उनले भने, ‘अर्थतन्त्रमा धेरै समस्या हुँदाहुँदै पनि केही सुधारका संकेत देखिँदैछन् ।’

अध्यक्ष ढकालले शिथिल बनेको अर्थतन्त्र उकास्न सामूहिक प्रयत्नको खाँचो रहेको उल्लेख गरे । ‘अर्थतन्त्र संकटमा पर्नुमा कुनै एउटा पक्ष मात्र दोषी छैन, यसका बहुआयामिक कारण छन्’, उनले भने, ‘यो अवस्थाबाट बाहिर निस्कन निजी क्षेत्र र सरकारले बलियो सहकार्य गर्नुपर्छ ।’

अध्यक्ष ढकालले कोभिड-१९, रुस-युक्रेन युद्ध, नीति निर्माणमा भएका त्रुटिलगायतका कारणले आर्थिक क्षेत्रमा संकट देखा परेको बताए । उनले आफू महासंघको नेतृत्वमा आएको पहिलो दिनदेखि नै अर्थतन्त्रमा देखिएको समस्या समाधानका लागि पहल थालेको बताए ।

‘सरकारसँग लगातार संवाद भइरहेको छ, कसरी अर्थतन्त्रलाई गति दिन सकिन्छ भनेर हामी लागिपरेका छौँ,’ उनले भने, ‘सरकार, नियमनकारी या कुनै संस्थालाई मात्र दोष दिएर पनि हुँदैन, सबै मिलेर संकटको समाधानतिर लाग्नुपर्छ ।’ निराशा मात्र बाँडेर नहुने भन्दै सकारात्मक कुराको प्रसार गर्नुपर्ने उनले बताए ।

उनले निजी क्षेत्र र सरकारले एक अर्कालाई हेर्ने दृष्टिकोण पनि बदल्नुपर्ने धारणा राखे । अध्यक्ष ढकालले राज्य सञ्चालनको ठूलो हिस्सा ओगटेको निजी क्षेत्रलाई गृह मन्त्रालयको मयार्दाक्रम समेत उपेक्षा गरिएको बताए । अर्थतन्त्रको सुधार, लगानी वृद्धि, रोजगारी सिर्जनालगायतका क्षेत्रमा महासंघले अगुवाइ गर्ने उनको भनाइ छ ।

विभिन्न कार्यक्रममा भाग लिन गृह जिल्ला बागलुङ पुगेका अध्यक्ष ढकाललाई बागलुङ उद्योग वाणिज्य संघ, बागलुङ नगरपालिकालगायतका संघसंस्थाले सम्मान गरेका थिए ।