सरकारले माग सम्बोधन नगरे राष्ट्र बैंक र संसद् घेर्छौंः कटुवाल

काठमाडौं । उद्योगी तथा व्यवसायीहरुले बैंक तथा वित्तीय संस्थाको चर्को ब्याजदरबिरुद्ध आन्दोलन गरेका छन् ।

आइतबार माइतीघर मण्डलामा भेला भएर विभिन्न व्यवासायी तथा उद्यागीहरुले आन्दोलन गरेका हुन् । आन्दोलनका क्रममा बोल्दै नेपाल राष्ट्रिय व्यवसायी महासंघका संस्थापक अध्यक्ष नरेश कटुवालले शान्तिपूर्ण आन्दोलन गर्दा सरकार र राष्ट्र बैंकले बेवास्ता गरेकाले अहिले पुनः आन्दोलन गर्नुपरेको बताए ।

बैंक तथा वित्तीय संस्थाको उच्च दर आतंकाकाबिरुद्ध आफूहरुले आन्दोलन गरेको उनले बताए । सरकारले व्यवसायीहरुका माग सम्बोधन नगरे झनै विकराल अवस्था आउने भन्दै उनले राष्ट्र बैंक र संसद् भवन घेराउ गर्ने चेतावनी दिए ।

‘बैंक तथा वित्तीय संस्थाको उच्च दर आतंकाकाबिरुद्ध हामीले आन्दोलन गरेका हौँ । देशभरबाट एकजुट भएर उद्योगी व्यापारीहरुको आन्दोलन हो । हामीले केही दिनपछि नै वृहत आन्दोलन घोषणा गर्नेछौँ । उद्योगी व्यवसायीमाथि बैंकहरुले दादागिरी देखाइरहेका छन् । यो मुलुकको लागि राम्रो पक्ष होइन, सरकारको ध्यान जाओस् । राष्ट्र बैंकको ध्यान जाओस्, यो विकराल हुँदैछ । राष्ट्र बैंक र संसद भवन घेराउ कार्यक्रम हुनसक्छ’कटुवालले भने ।

उनीहरुले मौद्रिक नीति परिमार्जन गर, ब्याज दरमा स्थिरता कायम गर, चालु पुँजी निर्देशिका स्थगित गर, ब्याजदर हामीलाई चर्को भयो, उच्च सेवा शुल्क बन्द गर लगायतका प्ले कार्ड बोकेर आन्दोलन गरेका थिए ।