घोषणापत्र कार्यान्वयन गर्न कार्ययोजना बनाउँछुः मेयर आचार्य



काठमाडौं । पोखरा महानगरपालिकाका नवनिर्वाचित प्रमुख धनराज आचार्यले आफ्नो घोषणापत्र कार्यान्वयनका लागि कार्ययोजना बनाउने बताएका छन् ।

निर्वाचिन भएपछि आचार्यले निर्वाचन घोषणापत्रअनुसार निर्वाचित भएको १ महिना, ६ महिना, १ वर्ष र ५ वर्षभित्रमा के–के काम गर्ने भनेर कार्ययोजना निर्माण गरेर अघि बढ्ने बताए । उनले अब पोखरेली जनताको जीवनयापन कसरी सहज र सरल बनाउन सकिन्छ भनेर कार्यक्रम ल्याइने जानकारी गराए ।

महानगरबाट सुशासनको प्रत्याभुत हुने गरी सेवा प्रवाह गर्ने आफ्नो पहिलो काम हुने आचार्यको भनाइ छ । महानगर प्रमुखमा निर्वाचित भएको घोषणापछि आचार्यले महानगर र महानगरअन्तर्गतका वडा कार्यालयको सेवा व्यवस्थित र बिनाझन्झट प्रदान गरिने बताए ।

‘हाम्रो पहिलो काम पोखरालाई सुशासनको प्रत्याभुत दिने हुनेछ’ उनले भने ‘महानगर र वडाबाट पोखरेली नागरिकलाई दिने सेवा व्यवस्थितरूपमा बिनाझन्झट प्रदान गर्छौँ ।’ पोखराको समग्र विकासका लागि पूर्वाधार निर्माणलगायत अल्पकालीन र दीर्घकालीन हिसाबले काम गर्ने प्रतिबद्धता जनाए ।

पाँच दलको शक्ति, सामाजिक क्षेत्रमा गरेको योगदानका कारणले जित सम्भव भएको उल्लेख गर्दै आचार्यले ठूलो सङ्ख्यामा मत बदर नभएको भए मतान्तर अझै बढ्ने बताए । आचार्यले नेकपा एमालेका कृष्णबहादुर थापालाई ६ हजार ४५ मतान्तरले पछि पराजित गर्दै विजयी भएका हुन् । आचार्यले ५८ हजार ८९३ मत प्राप्त गर्दा उनका निकटतम् प्रतिस्पर्धी थापाले ५२ हजार ८४८ मत ल्याए ।


क्लिकमान्डु