लकडाउनमै ऋणीलाई फोन गरेर सावाँ-ब्याज तिर्न बैंकको दबाब
काठमाडौं । खासै राम्रो पर्फमेन्स देखाउन नसकेको सांग्रिला डेभलपमेन्ट बैंकका कर्जा शाखाका एक कर्मचारीले बिहीबार एक ऋणीलाई फोन गरेर भने-सर नमस्कार म सांग्रिला बैंकबाट बोल्दैछु । आराम हुनुहुन्छ ?
ऋणीले भनेः आरामै छु हजुर ।
बैंकका कर्मचारीः तपाईंले लिएको ऋणको किस्ता २ महिना (चैत र बैशाख) ड्यु भएको छ ।
ऋणीले भनेः हजुर भन्नुस् न ।
कर्मचारीः तपाईं जागिर खानुहुन्छ कि के गर्नुहुन्छ ?
ऋणीः जागिर खान्छु ।
कर्मचारीः लकडाउनयता तलब आएको छ कि छैन ?
ऋणीः आइराछ अलिअलि ।
कर्मचारीः कति ?
ऋणीः ५०/६० प्रतिशत ।
कर्मचारीः तलब आएकै रहेछ, किस्ता तिर्नुस् न है ।
ऋणीः ५० प्रतिशत तलब आएको छ । खर्च गर्दै ठीक छ ।
कर्मचारीः किस्ता ड्यु छ । भन्नुस् कहिले तिर्नुहुन्छ ।
ऋणीः लकडाउन खुलेपछि ।
कर्मचारीः खुलेकै भोलिपल्ट हाल्दिनुस् है ।
ऋणीः हैन के सारो केरकार गर्नुभएको । राष्ट्र बैंकले नै असार मसान्तसम्ममा तिर्दा हुन्छ भनेको छ त ।
कर्मचारीः राष्ट्र बैंकको भन्ने काम हो भन्छ नि । हामीलाई पनि त गाह्रो छ नि ।
ऋणीः तपाईं बैंकलाई गाह्रो छ भने हामी जनतालाई झन् कति गाह्रो होला ?
कर्मचारीः सबैलाई गाह्रो छ । सकेसम्म छिटै हाल्निुनोस् न है ।
ऋणीः हुन्छ प्रयास गर्छु । असार मसान्तमाचाहीँ कन्फर्म आउँछ ढुक्क हुनुहोस् । अब फोन गरिरहनु पर्दैन ।
कर्मचारीः हस् धन्यवाद ।
यो त एउटा प्रतिनिधि घटना मात्रै हो । अधिकांश बैंक तथा वित्तीय संस्थाहरुले ऋणीलाई फोन गरेर किस्ता तिर्न दबाब दिइरहेका छन् ।
राष्ट्र बैंकले ऋणको साँवा/ब्याज तिर्ने समय असार मसान्त पुर्याएपनि बैंकहरु भने लकडाउनकै बेला धमाधम ऋणीलाई फोन गरेर पैसा तिर्न दबाब दिइरको छन् ।
खासगरी बैंकहरुले साना ऋणीलाई बढी दबाब दिइरहेका छन् । कोरोनाले पनि साना तथा मझौला उद्योगलाई बढी प्रभावित गरेको निष्कर्श निकाल्दै सरकारले साना ऋणीलाई विशेष राहत प्याकेज ल्याउने तयारी गरिरहेका बेला बैंकहरुले भने ऋण उठाउन उत्रिएका हुन् ।
राष्ट्र बैंकले ऋणीहरुलाई दिएको सहुलियत दिन पनि बैंकहरु हिच्किचाएका छन् । ऋणी आफैंले यस्तो व्यवस्था छ नि भन्दा समेत बैंकको कर्जा शाखाका कर्मचारीहरु अन्कनाउँदै स्वीकार गर्छन् ।
पुष्प दुलाल
