बैंकहरुको खराब कर्जा बढ्यो, कसको कति सूचिसहित)

काठमाडौं । सञ्चालनमा रहेका २८ वटा वाणिज्य बैंकहरुको खराब कर्जा बढेको छ । बैंकहरुले दिएको ऋण उठाउन नसकेपछि बैंकहरुको खराब कर्जा बढेको हो । चालु आवको पहिलो त्रैमाससम्ममा ११ वटा बैंकको खराब कर्जा बढेको छ भने बाँकी रहेको बैंकहरुको खराब कर्जा घटेको छ ।

खराब कर्जा बढने बैंकहरुमा सानिमा, एनआईसी एसिया, नबिल, मेगा, बैंक अफ काठमाण्डू, एनएमबी, नेपाल बंगलादेश, सेन्चुरी, नेपाल इन्भेष्टमेन्ट, प्रभु बैंक रहेका छन् ।
प्रभु बैंकको गत आवको पहिलो त्रैमासमा २.५१ प्रतिशत रहेको खराब कर्जा चालु आवको सोहि अवधिमा आईपुग्दा बढेर ३.३२ प्रतिशत पुगेको छ ।

यस्तै इन्भेष्टमेन्ट बैंकको १.२१ प्रतिशतबाट बढेर २.८४ प्रतिशत पुगेको छ । नेपाल बंगलादेशको पनि १.५५ प्रतिशतबाट बढेर १.९७ प्रतिशतमा पुगेको छ । यो अवधिमा सबै भन्दा कम खराब कर्जा हुने बैंकमा एभरेष्ट र नेपाल एसबीआई बैंक रहेका छन् । यी दुवै बैंकको खराब कर्जा घटेर दुवैको ०.१७ प्रतिशत रहेको छ । यी दुई बैंकको कर्जामा भएको लगानीमा जोखिम कम रहेको देखिएको छ ।

भाखा नाघेको एक वर्ष नपुगेको कर्जालाई खराब कर्जाको रुपमा राख्नुपर्ने व्यवस्था छ । राष्ट्र बैंकले तोकिएको समयमा ऋण नउठेर ३ महिना नाघेको कर्जामा २५, ६ महिना नाघेमा ५० र एक वर्ष नाघेमा शत प्रतिशत प्रोभिजनिङ (जोखिम व्यवस्था) गर्नुपर्ने व्यवस्था गरेको छ । बैंक तथा वित्तीय संस्थामा खराब कर्जा जति कम भयो बैंक तथा वित्तीय संस्थाको अवस्था त्यति नै राम्रो मानिन्छ । राष्ट्र बैंकले कूल कर्जाको ५ प्रतिशतभन्दा बढी खराब कर्जा हुन नहुने व्यवस्था गरेको छ ।