वैदेशिक रोजगार बोर्डको कार्यकारी निर्देशकका लागि दरखास्त आह्वान

काठमाडौं । नेपाल सरकार, युवा, श्रम तथा रोजगार मन्त्रालयले वैदेशिक रोजगार बोर्डको कार्यकारी निर्देशक पदपूर्तिका लागि आवेदन माग गरेको छ ।

मन्त्रालयले आइतबार (असार ३० गते) एक सार्वजनिक सूचना जारी गर्दै खुला प्रतिस्पर्धात्मक प्रक्रियामार्फत उक्त रिक्त पदको पदपूर्तिका लागि योग्य नेपाली नागरिकहरूबाट दरखास्त आह्वान गरेको हो ।

वैदेशिक रोजगार ऐन, २०६४ को दफा ४१ को उपदफा (१) मा रहेको व्यवस्था बमोजिम बोर्डको कार्यकारी प्रमुखका रूपमा रहने कार्यकारी निर्देशक छनोट गर्न लागिएको मन्त्रालयले जनाएको छ ।

यस पदका लागि आवेदन दिन चाहने उम्मेदवारहरूको योग्यता तथा अनुभव वैदेशिक रोजगार नियमावली, २०६४ को नियम ३० बमोजिम हुनुपर्ने सूचनामा उल्लेख छ । न्यूनतम शैक्षिक योग्यता र सम्बन्धित क्षेत्रमा आवश्यक कार्य अनुभव हासिल गरेका इच्छुक नेपाली नागरिकले यो अवसरका लागि प्रतिस्पर्धा गर्न पाउनेछन् ।

इच्छुक र योग्य उम्मेदवारहरूले सूचना प्रकाशित भएको मितिले १५ दिनभित्र तोकिएको ढाँचामा आफ्नो आवेदन पेश गरिसक्नुपर्नेछ । दरखास्त फाराम सिंहदरबारस्थित युवा, श्रम तथा रोजगार मन्त्रालयको सिफारिस समितिको सचिवालय, प्रशासन महाशाखामा बुझाउनुपर्ने व्यवस्था मिलाइएको छ । निर्धारित समयभन्दा ढिलो प्राप्त हुने वा तोकिएको मापदण्ड नपुगेका आवेदनहरू उपर कुनै कारबाही नहुने समेत सूचनामा स्पष्ट पारिएको छ ।