लञ्च गरिसकेको फिचर्स किन बन्द गर्‍यो मेटाले ?

एजेन्सी । मेटाले हालै सार्वजनिक गरेको आफ्नो नयाँ आर्टिफिसियल इन्टेलिजेन्स टुल ‘म्युज इमेज’ विवादमा परेपछि त्यसको एउटा मुख्य फिचर बन्द गर्ने निर्णय गरेको छ ।

यो टुलले प्रयोगकर्ताको स्पष्ट अनुमति बिना नै उनीहरूका सार्वजनिक इन्स्टाग्राम फोटोहरू प्रयोग गरी नयाँ तस्बिरहरू बनाउन अनुमति दिएपछि विश्वभर गोपनीयता सम्बन्धी चिन्ता र बहस बढेको थियो । मेटाको यो नयाँ सिर्जनात्मक औजारले प्रयोगकर्ताको फोटोलाई कसरी प्रयोग गर्छ भन्ने कुरा सुरुमा स्पष्ट नहुँदा र यसलाई स्वतः लागू गरिएकाले धेरैले यसको कडा विरोध गरेका हुन् ।

विवादको मुख्य कडी ‘म्युज इमेज’ मा रहेको एउटा विशेष क्षमता थियो, जसले प्रयोगकर्तालाई कुनै पनि ‘पब्लिक’ इन्स्टाग्राम एकाउन्टलाई ट्याग गरेर ती व्यक्तिको जस्तै देखिने वा हुबहु अनुहार मिल्ने एआई तस्बिरहरू बनाउन सक्ने सुविधा दिएको थियो ।

यसको सबैभन्दा गम्भीर पक्ष के थियो भने, यदि कुनै प्रयोगकर्ताले आफ्नो सेटिङमा गएर आफैंले यो सुविधा बन्द नगरेसम्म कसैले पनि उनीहरूको फोटो प्रयोग गर्न सक्थे । यसले साइबर सुरक्षा र व्यक्तिगत पहिचानको सुरक्षामा ठूलो चुनौती थपेको भन्दै विज्ञहरूले ‘डीपफेक’ र अनलाइन उत्पीडनको जोखिम बढ्न सक्ने चेतावनी दिएका थिए ।

यो फिचर सार्वजनिक भए लगत्तै हलिउडका कलाकारहरू र प्रतिष्ठित कलाकार युनियनले मेटाको कदमलाई अस्वीकार्य  भन्दै कडा विरोध जनाए । अभिनेत्री हन्ना आइनबाइन्डर लगायतका धेरै प्रभावशाली व्यक्तिहरूले आफ्ना फलोअरहरूलाई तुरुन्तै आफ्नो प्राइभेसी सेटिङ परिवर्तन गर्न आग्रह गरेका थिए । कलाकार युनियनले यो फिचरलाई डिजिटल अधिकार र पहिचानको हननका रूपमा चित्रण गरेपछि मेटामाथि ठूलो नैतिक र कानुनी दबाब सिर्जना भएको थियो ।

चौतर्फी दबाब र आलोचना पछि मेटाले शुक्रबार राति एक विज्ञप्ति जारी गर्दै उक्त विवादित ‘ट्यागिङ’ फिचरलाई बन्द गरिएको जानकारी दियो । मेटाका प्रवक्ताले कम्पनीको उद्देश्य मानिसहरूलाई एक नयाँ सिर्जनात्मक अनुभव प्रदान गर्नु भए तापनि प्रयोगकर्ताहरूको प्रतिक्रियाका आधारमा यो फिचरले लक्षित सफलता पाउन नसकेको स्वीकार गरेका छन् ।

हाललाई विवादित फिचर हटाए पनि प्रविधि विज्ञहरूले प्रयोगकर्ताहरूलाई आफ्ना सामग्री सुरक्षित राख्न एकाउन्टलाई ‘प्राइभेट’ बनाउन वा सेटिङमा गएर एआईको पहुँचलाई बन्द गर्न सुझाव दिएका छन् । यो घटनाले एआईको तीव्र विकाससँगै व्यक्तिगत गोपनीयताको रक्षा कसरी गर्ने भन्ने विषयमा नयाँ बहसको सुरुवात गरेको छ ।