एजेन्सी । टर्कीको राजधानी अंकारामा बुधबार पत्रकारहरूले अमेरिकाका राष्ट्रपति डोनल्ड ट्रम्पलाई इरानसँगको युद्धविराम समाप्त भएको हो भनी सोधे ।
जवाफमा अमेरिकी राष्ट्रपतिले भने, ‘यो निकै चाखलाग्दो प्रश्न हो । मेरो विचारमा यो सकियो । अब म उनीहरूसँग कुनै सरोकार राख्न चाहन्नँ ।’
उनले अगाडि थपे, ‘मेरो लागि यो सकिएको छ । म हाम्रा वार्ताकारहरूसँग कुरा गर्नेछु, उनीहरू वार्ता गर्न चाहन्छन् । तर, मलाई लाग्छ उनीहरूसँग व्यवहार गर्नु समयको बर्बादी मात्र हो ।’
अमेरिका र इरानले गत जुन १७ मा एक समझदारी पत्रमा हस्ताक्षर गरेका थिए जसले दुई देशबीचको सैन्य गोलाबारीलाई रोकेको थियो र अन्तिम शान्ति सम्झौतामा पुग्नका लागि ६० दिनको वार्ता अवधि तय गरेको थियो ।
तर, हर्मुज जलयोजकमा व्यावसायिक जहाजहरूमाथि आक्रमण भएको जवाफमा अमेरिकी सेनाले गए राति इरानविरुद्ध शक्तिशाली आक्रमणहरूको शृंखला सुरु गरेको छ ।
इरानमाथि भएको अमेरिकी आक्रमणपछि पहिलोपटक बोल्दै ट्रम्पले क्यान्सरलाई काटेर फाल्नुपर्ने अभिव्यक्ति दिएका छन् । अंकारामा नेटो प्रमुख मार्क रुट्टसँगको भेटमा उनले अमेरिकी सेनाले गए राति अत्यन्तै शक्तिशाली रूपमा आक्रमण गरेको बताए ।
उनले इरानीहरूप्रति लक्षित गर्दै भने, ‘उनीहरू बिरामी छन् । उनीहरूमा केही न केही खराबी छ । हामीले उनीहरूलाई आफ्नो अन्त्येष्टिको काम सम्पन्न गर भनेका थियौं, तर त्यसको सट्टा उनीहरूले हिजो रकेट प्रहार गर्न र जहाजहरूमाथि आक्रमण गर्न थाले । त्यसैले हामीले गए राति उनीहरूलाई निकै कडा प्रहार गर्यौं ।’
ट्रम्पका अनुसार, यो अमेरिकी आक्रमण इरानले गरेको प्रतिशोधात्मक आक्रमणभन्दा २० गुणा बढी कडा थियो ।
उनले अगाडि थपे, ‘मैले उनीहरूलाई भनेको थिएँ कि तिमीहरूले प्रहार गरेपछि हामी पनि प्रहार गर्नेछौं । उनीहरू फोहोरी खेलाडी हुन् । त्यसैले उनीहरूले सबैलाई दुःख दिन्छन् । हामी उनीहरूलाई मन पराउँदैनौं, म उनीहरूलाई मन पराउँदिनँ, उनीहरू दुष्ट मानिसहरू हुन् ।’
ट्रम्पले इरानसँग अमेरिकाले धेरै समय खेर फालेको र उनीहरूले धेरै पहिले नै शान्ति सम्झौता गरिसक्नुपर्नेमा उनीहरूले के गरिरहेका छन् भन्ने उनीहरूलाई नै थाहा नभएको टिप्पणी गरे ।
उनले इरानलाई क्यान्सरको संज्ञा दिँदै भने, ‘यी मानिसहरू दुष्ट र बिरामी छन् । हामीले उनीहरूलाई हटाउनुपर्छ । उनीहरू क्यान्सर हुन् । तपाईंलाई थाहा छ, क्यान्सरलाई के गरिन्छ ? क्यान्सरलाई समयमै काटेर फाल्नुपर्छ ।’
प्रतिक्रिया