७० वर्षमा पहिलोपटक होन्डाले बेहोर्यो घाटा

एजेन्सी । अटो उद्योगले आफ्ना विद्युतीय सवारीसाधन (ईभी) योजनाहरूबाट हात झिक्दा होन्डा प्रभावित भएको छ । यसले सन् १९५५ यता पहिलोपटक वार्षिक घाटा बेहोरेको छ ।

ट्रम्प प्रशासनले अमेरिकी उत्सर्जन नियमहरू परिवर्तन गरेपछि र अमेरिकी खरिदकर्ताहरूका लागि उपलब्ध ७५ सय डलरको कर छुट अन्त्य गरेपछि होन्डा र अन्य विश्वव्यापी अटो निर्माताहरूले आफ्ना ईभी लक्ष्यहरूलाई घटाएका छन् । सेप्टेम्बरमा कर छुट हटेपछि ईभीको बिक्रीमा उल्लेख्य गिरावट आयो र हालै पेट्रोलको मूल्यमा भएको वृद्धिले पनि अमेरिकी खरिदकर्ताहरूमा ईभीको मागमा कुनै खास बढोत्तरी ल्याएको छैन ।

कार कम्पनीहरूले अमेरिकामा निकै कडा उत्सर्जन नियमहरू लागू हुने अपेक्षा गरेका थिए जसका कारण उनीहरूले आगामी दशकभित्र पूर्ण रूपमा इलेक्ट्रिक सवारी साधनहरूको लाइनअपतर्फ जान अर्बौं डलर लगानी गरेका थिए ।

तर, बाइडन प्रशासनले लागू गरेका कडा उत्सर्जन नियमहरू ट्रम्प प्रशासनले खारेज गरिदियो र उत्सर्जन नियमहरू उल्लंघन गर्दा अटो निर्माताहरूले भोग्नुपर्ने ठूलो आर्थिक जरिवानालाई पनि हटाइदियो ।

ती परिवर्तनहरूले अटो निर्माताहरूलाई पुनः ठूला पेट्रोल–चालित ट्रक र एसयूभीहरू बिक्री गर्नमा ध्यान केन्द्रित गर्न प्रेरित गरे जसमा उनीहरूले सबैभन्दा बढी नाफा कमाउँछन् । तर, यो परिवर्तन अटो निर्माताहरूका लागि महँगो साबित भएको छ किनकि उनीहरू आफ्ना ठूला ईभी लगानीहरूको मूल्यमा गिरावट देखाउन बाध्य भएका छन् ।

मार्चमा समाप्त भएको आफ्नो आर्थिक वर्षका लागि होन्डाले आफ्नो आम्दानीमा १६ खर्ब येन वा झण्डै १० अर्ब डलरको नोक्सानी बेहोरेको जानकारी दिएको छ जसले सम्भावित ७.४ अर्ब डलरको वार्षिक नाफालाई पूरै समाप्त पारिदिएको छ । यसको सट्टा कम्पनीले ४०३.३ अर्ब येन वा २.६ अर्ब डलरको खुद घाटा सार्वजनिक गरेको छ ।

होन्डाले चालु आर्थिक वर्षमा आफ्नो अघिल्लो ईभी लगानीमा थप मूल्य गिरावट हुने अपेक्षा गरेको संकेत पनि गरेको छ यद्यपि यसले अर्को घाटा भने निम्त्याउने छैन ।

होन्डाको यो परिणाम जनरल मोटर्सपछि आएको हो । त्यसले सन् २०२५ मा आफ्नो ईभी प्रयासहरूमा गरेको कटौतीका कारण ७.२ अर्ब डलरको भार बेहोरेको थियो । त्यस्तै, प्रतिस्पर्धी फोर्डले त्यस वर्ष १७.४ अर्ब डलरको र उत्तर अमेरिकामा जिप, र्याम, डज र क्राइस्लर ब्रान्ड अन्तर्गत कार बनाउने स्टेलाटिसले २५.४ अर्ब युरो वा २९.७ अर्ब डलरको भार बेहोरेको जानकारी दिएका थिए ।

भारी नोक्सानीको भारका बावजुद पनि जीएमले त्यस वर्ष नाफा कमाउन सफल भयो । तर, ईभीबाट पछि हट्दा लागेको लागतका कारण फोर्ड र स्टेलाटिसले सन् २०२५ मा खुद घाटा बेहोर्नुपर्यो । फोर्डले यस वर्ष पनि थप नोक्सानीको भार हुने अपेक्षा गरेको छ ।

तैपनि अटो निर्माताहरूले ईभी योजनाहरू पूर्ण रूपमा भने त्यागेका छैनन् । युरोप र एसियामा अझै कडा उत्सर्जन नियमहरू आउँदैछन् र सम्भवतः क्यालिफोर्नियाको नेतृत्वमा धेरै अमेरिकी राज्यहरूमा पनि यस्तै नियम लागू हुनेछन् । क्यालिफोर्नियामा सन् २०३५ सम्ममा नयाँ पेट्रोल–चालित कारहरूको बिक्रीमा प्रतिबन्ध लगाउने नियम कानुनमै व्यवस्था छ यद्यपि कंग्रेसले सो प्रतिबन्ध कार्यान्वयन हुन नदिन कदम चालेको छ ।

अटो निर्माताहरू मुख्य रूपमा ईभी बिक्री गर्ने चिनियाँ अटो निर्माताहरूबाट बढ्दो प्रतिस्पर्धालाई लिएर पनि चिन्तित छन् । अमेरिकी बजारमा चिनियाँ अटो निर्माताहरूको उपस्थिति अहिलेसम्म तुलनात्मक रूपमा निकै कम छ ।