इरान र अमेरिकाबीचको दोस्रो चरणको वार्ता गराउन पाकिस्तान तयार, इरानीहरूको छैन टुंगो

एजेन्सी । मंगलबार बिहान पाकिस्तानको राजधानी इस्लामाबाद दोस्रो चरणको वार्ताको आयोजना गर्न पूर्ण रूपमा तयार देखिएको छ । तर, वार्तामा दुवै पक्ष सहभागी हुने कि नहुने विषयमा भने अन्योल कायमै छ ।

इरानी मन्त्रीहरूले शक्तिप्रदर्शनको धम्कीका बीच वार्ताको टेबुलमा आउन अस्वीकार गर्ने बताइरहेको र अमेरिकी उपराष्ट्रपति जेडी भ्यान्स वाशिङटनबाट इस्लामाबादका लागि कहिले प्रस्थान गर्छन् भन्ने कुरा स्पष्ट नभए पनि पाकिस्तानी अधिकारीहरू भने दोस्रो चरणको वार्ता हुनेमा आशावादी रहे ।

इस्लामाबादको पाँचतारे सेरेना होटल वरपरका सडकहरू बन्द गरिएका थिए जहाँ पहिलो चरणको वार्ता २१ घण्टासम्म तनावपूर्ण रूपमा चलेको थियो तर कुनै सम्झौता हुन सकेको थिएन ।

पछिल्ला केही दिनयता इस्लामाबाद र अन्य प्रमुख शहरहरूले ७ घण्टाभन्दा लामो लोडसेडिङको सामना गरिरहेका छन् ।

हर्मुज जलयोजकको जारी नाकाबन्दीका कारण देशले गम्भीर ऊर्जा संकट बेहोरिरहेको छ । यसले दक्षिण एसियाली देशहरूका लागि यो वार्ताको आर्थिक महत्त्वलाई प्रस्ट पारेको छ ।

छिमेकी देश बंगलादेशले पनि पावर स्टेशनहरू सञ्चालनका लागि इन्धन अभाव भएका कारण आफ्नो मोबाइल नेटवर्क छिट्टै बन्द हुन सक्ने चेतावनी यसै हप्ता दिएको छ ।

इस्लामाबादको विद्युत् बोर्डले सोमबार राति एक विज्ञप्ति जारी गर्दै अमेरिकी र इरानी वार्ताकारहरू बैठकको अवधिभर अन्धकारमा बस्नु नपरोस् भन्नका लागि पर्याप्त विद्युत् उपलब्ध हुने आश्वासन दिएको छ ।