अमेरिकाका रक्षामन्त्री हेगसेथविरुद्ध ६ वटा महाभियोग प्रस्ताव दर्ता

एजेन्सी । अमेरिकी प्रतिनिधिसभाका डेमोक्रेट सांसदहरूले बुधबार रक्षा पिट हेगसेथविरुद्ध ६ वटा महाभियोगका बुँदाहरू दर्ता गरेका छन् ।

उनीहरूले संसद्को अनुमति बिना इरानमाथि गरिएको आक्रमण र लागूऔषध तस्करीको आशंका गरिएका डुंगाहरूमाथि गरिएको घातक आक्रमण लगायतका अन्य आधिकारिक कार्यहरूलाई उद्धृत गर्दै उनलाई गम्भीर अपराध र दुराचारको आरोप लगाएका छन् ।

ट्रम्प प्रशासनले हालैका वैदेशिक कदमहरू, विशेषगरी इरानसँगको युद्ध, लाई लिएर बढ्दो छानबिनको सामना गरिरहेका बेला यो कदम चालिएको हो ।

बुधबारको प्रस्तावमा एरिजोनाकी डेमोक्रेटिक कंग्रेस सदस्य यासामिन अन्सारी र कनेक्टिकटका जोन लार्सन लगायतका सहकर्मीहरूले हेगसेथलाई सशस्त्र द्वन्द्वका क्रममा नागरिक हताहती कम गर्ने नियमहरूको बेवास्ता गरेको आरोप लगाएका छन् ।

न्युयोर्क टाइम्सको एक रिपोर्ट अनुसार, मार्चमा इरानको एक विद्यालयमा गरिएको आक्रमणमा कम्तीमा १७५ जनाको मृत्यु भएको थियो जसमा बालबालिकाहरू पनि समावेश थिए र यसका लागि अमेरिका जिम्मेवार हुन सक्छ ।

प्रतिनिधिसभाका डेमोक्रेटहरूले क्यारिबियाली क्षेत्रमा भइरहेका डुंगा आक्रमणहरूको बढ्दो संख्यातर्फ पनि औंल्याएका छन् । सेनाले ती जहाजहरूमा रहेका व्यक्तिहरूलाई बारम्बार नार्को–आतंकवादी (लागूऔषध आतंककारी) को रूपमा चित्रण गर्ने प्रयास गरेको छ ।

सन् २०२५ मा सिग्नल एपमा वर्गीकृत (गोप्य) सूचनाहरू साझा गरिएको एक घटनालाई उद्धृत गर्दै प्रतिनिधिसभाका डेमोक्रेटहरूले हेगसेथलाई लापरबाही र अनुचित आचरण मार्फत राष्ट्रिय सुरक्षामा आँच पुर्याएको आरोप पनि लगाएका छन् ।

गत वर्ष यमनका हुती लडाकुहरूमाथि गरिने भनिएको हवाई हमलाको बारेमा छलफल गर्न बनाइएको सिग्नल ग्रुप च्याटमा दी एट्लान्टिक पत्रिकाका प्रधानसम्पादक जेफ्री गोल्डबर्गलाई थपिएपछि रक्षामन्त्री विवादमा परेका थिए । उक्त च्याटमा हेगसेथ, उपराष्ट्रपति जेडी भान्स र सीआईए निर्देशक जोन र्याटक्लिफ पनि सहभागी थिए ।

महाभियोगका बुँदाहरूमा हेगसेथले इरान र भेनेजुएलामा भएका नागरिक हताहती र सैन्य सञ्चालनसम्बन्धी तथ्यहरू लुकाउने प्रयास गरेको, सेवानिवृत्त अमेरिकी जलसेना क्याप्टेन सिनेटर मार्क केल्लीले सैन्य सदस्यहरूलाई गैरकानूनी आदेशहरू अस्वीकार गर्न सकिने कुरा सम्झाएकोमा उनलाई सजाय दिने प्रयास गरेको र तेस्रोलिंगी सेवा सदस्यहरूलाई सेनाबाट जबर्जस्ती निकालेको विषयहरू पनि समावेश छन् ।

‘पिट हेगसेथले अमेरिकी संविधानप्रतिको आफ्नो शपथको पालना गरेनन्,’ अन्सारीले रिपोर्टर पाब्लो मानरिकेजलाई भनिन्, ‘उनले इरानको एक विद्यालयमा आक्रमण गरेर युद्ध अपराध गरे जहाँ १६० भन्दा बढी बालबालिकाको मृत्यु भयो । त्यसैले हामीले यो युद्ध अन्त्य मात्र गर्ने नभई अमेरिकी प्रशासनमा रहेका जोकोहीले युद्ध अपराध गरेका छन् भने उनीहरूलाई जवाफदेही बनाउनुपर्छ र कारबाही चलाउनुपर्छ ।’

‘पिट हेगसेथले अपराध गरिरहेका छन् र आफ्नो शपथको उल्लंघन गरिरहेका छन्,’ अन्सारीले थपिन्, ‘त्यसैले मलाई कुनै शंका छैन, यो पूर्ण रूपमा जोकर व्यक्ति – पूर्व फक्स न्युजको मान्छे, जो वास्तविक समाचार प्रस्तोता समेत थिएन – आफ्नो पदमा रहिरह्यो भने, यस्ता घटनाहरू थप हुनेछन् र हामीले अझ बढी समर्थन पाउनेछौं । म मेरा सहकर्मीहरूलाई मसँग जोडिन आग्रह गर्छु । उनी अमेरिकाका लागि राष्ट्रिय सुरक्षा जोखिम हुन् ।’

पेन्टागनका प्रवक्ता किंग्सले विल्सनले यी महाभियोगका बुँदाहरूलाई ध्यान आकर्षित गर्ने एउटा दाउको रूपमा खारेज गरिदिए ।

‘यो हामीले यहाँ युद्ध विभागमा हासिल गरेका प्रमुख सफलताहरूबाट अमेरिकी जनताको ध्यान भड्काउने प्रयास स्वरूप गरिएको अर्को एउटा प्रहसन मात्र हो,’ विल्सनले एक्सियोसलाई दिएको एक बयानमा भने ।

सिनेट र प्रतिनिधिसभा दुवैमा रिपब्लिकनहरूको बहुमत भएकाले यो महाभियोग प्रस्ताव कंग्रेसबाट पारित हुने सम्भावना निकै कम छ ।