एजेन्सी । भारतले आइतबार अरुणाचल प्रदेश लगायतका भारतीय भूभागका स्थानहरूलाई काल्पनिक नाम दिएकोमा चीनको कडा आलोचना गर्दै त्यसलाई दुराशयपूर्ण प्रयास भनेको छ ।
भारतको विदेश मन्त्रालयले एक कडा विज्ञप्ति जारी गर्दै भनेको छ, ‘भारतको भूभागको हिस्सा रहेका स्थानहरूलाई काल्पनिक नाम दिने चिनियाँ पक्षको कुनै पनि दुराशयपूर्ण प्रयासलाई भारत स्पष्ट रूपमा अस्वीकार गर्छ ।’
‘गलत दाबीहरू प्रस्तुत गर्ने र आधारहीन कथाहरू बनाउने चीनको यस्तो प्रयासले अरुणाचल प्रदेश लगायतका यी स्थान र क्षेत्रहरू भारतको अभिन्न र अविच्छेद्य अंग थिए, छन् र सधैं रहनेछन् भन्ने अकाट्य यथार्थलाई बदल्न सक्दैन,’ विज्ञप्तिमा थपिएको छ ।
मन्त्रालयले यी कार्यहरू भारत–चीन द्विपक्षीय सम्बन्धलाई स्थिर बनाउन भइरहेका प्रयासहरूका लागि हानिकारक रहेको बतायो । बेइजिङलाई सम्बन्धमा नकारात्मकता थप्ने र आपसी समझदारी कायम गर्ने प्रयासहरूलाई कमजोर पार्ने कार्यहरूबाट टाढै रहन आग्रह गरेको छ ।
बेइजिङले अरुणाचल प्रदेशका धेरै स्थानहरूको चिनियाँ नाम घोषणा गरेपछि भारतको यो प्रतिक्रिया आएको हो ।
यसअघि मे २०२५ मा पनि भारतले २७ वटा स्थानको नाम परिवर्तन गर्ने बेइजिङको हास्यास्पद प्रयासलाई त्यसैगरी अस्वीकार गरेको थियो ।
चीनले सन् २०१७, २०२१, २०२३ र २०२४ मा पनि यस्तै अभ्यासहरू गरेको थियो जुन प्रायः सीमामा तनाव बढेको समयमा हुने गर्थ्यो । सन् २०१७ मा यस्तो पहिलो कदम दलाई लामाले उक्त राज्यको भ्रमण गरेपछि चालिएको थियो ।
यो कूटनीतिक प्रतिवाद लद्दाखमा क्षेत्रीय विवादसम्बन्धी जारी घर्षणका बीच आएको हो जहाँ बेइजिङले अफगानिस्तान र पाकिस्तान नियन्त्रित कश्मीरको सीमा नजिक सिन्जियाङ क्षेत्रमा नयाँ प्रशासनिक निकाय स्थापना गरेको छ ।
सन् २०२० को गलवान झडपपछि भारत र चीनबीचको सम्बन्धमा केही सुधार देखिएको थियो जसमा प्रधानमन्त्री नरेन्द्र मोदीले एससीओ शिखर सम्मेलनका लागि चीनको भ्रमण गरेका थिए र चिनियाँ राष्ट्रपति सी चिनपिङसँग द्विपक्षीय भेटवार्ता गरेका थिए ।
यद्यपि, सीमा क्षेत्रमा चीनका गतिविधिहरू नयाँ दिल्लीका लागि निरन्तर चिन्ताको विषय बनेका छन् ।
प्रतिक्रिया