इरानले गर्यो हर्मुज जलयोजकमा जहाजहरूका लागि वैकल्पिक मार्गको घोषणा

एजेन्सी । इरानले बिहीबार हर्मुज जलयोजक भएर यात्रा गर्ने जहाजहरूका लागि वैकल्पिक मार्गहरूको घोषणा गरेको छ ।

यस महत्त्वपूर्ण जलमार्गको मुख्य क्षेत्रमा समुद्री बारुदी सुरुङको जोखिम रहेको कारण देखाउँदै इरानले यस्तो निर्णय गरेको हो ।

दुई हप्ताको युद्धविरामको हिस्सास्वरूप तेहरानले अस्थायी रूपमा यो जलमार्ग पुनः खोल्न सहमति जनाएको छ । यसबाट सामान्यतया विश्वको २० प्रतिशत तेल ओसारपसार हुने गर्छ ।

स्थानीय सञ्चारमाध्यमले उद्धृत गरेको इरानको रिभोलुसनरी गार्ड्सको विज्ञप्तिमा भनिएको छ, ‘हर्मुज जलयोजक पार गर्ने उद्देश्य राख्ने सबै जहाजहरूलाई समुद्री सुरक्षाका सिद्धान्तहरूको पालना गर्न र समुद्री बारुदी सुरुङहरूसँग हुन सक्ने सम्भावित टक्करबाट बच्नका लागि… आवागमनका वैकल्पिक मार्गहरू प्रयोग गर्न सूचित गरिन्छ ।’

विज्ञप्तिमा जलयोजक भएर प्रवेश गर्ने र बाहिर निस्कने वैकल्पिक मार्गका लागि निर्देशनहरू पनि साझा गरिएको छ ।

हर्मुज जलयोजक पुनः खोल्ने सम्झौताका लागि आफ्ना मागहरूसामु नझुकेमा इस्लामिक गणतन्त्रलाई ध्वस्त पार्ने अमेरिकाका राष्ट्रपति डोनल्ड ट्रम्पको समयसीमा सकिन एक घण्टाभन्दा कम समय बाँकी छँदा मंगलबार र बुधबारको बीचको रात अमेरिका र इरान दुई हप्ताको युद्धविरामका लागि सहमत भएका थिए ।

तेहरानले मार्चको सुरुदेखि नै यो महत्त्वपूर्ण ढुवानी मार्गलाई प्रभावकारी रूपमा बन्द गरिदिएको थियो, जसका कारण विश्वव्यापी ऊर्जाको मूल्य आकाशिएको थियो ।