एनजीसीसीआई जर्मनीमा ट्रेडिङ हब स्थापना गर्ने

काठमाडौं । फिनल्याण्ड दूतावास, नेपाल र नेपाल जर्मन चेम्बर अफ कमर्स एन्ड इन्डष्ट्रि एनजीसीसीआईबीचको बैठकमा नेपाल र फिनल्याण्ड तथा अन्य युरोपेली संघका सदस्य राष्ट्रहरूबीच व्यापार र आर्थिक सहकार्यलाई प्रवर्द्धन गर्ने अवसरहरूको अन्वेषणबारे छलफल गरिएको छ । बैठकमा नेपाली उत्पादनहरूको युरोपेली बजारमा पहुँच विस्तार गर्न र द्विपक्षीय आर्थिक संलग्नतालाई सुदृढ बनाउन ट्रेडिङ हब स्थापना गर्ने विषयमा पनि छलफल भएको थियो ।

फिनल्याण्डका राजदूत पेत्रि पूहक्काले एनजीसीसीआईको कार्यकारी समितिसँगको बैठकमा दुई देशबीचको व्यापार र आर्थिक संलग्नता हाल सानो रहेको बताए । उनले फिनल्याण्ड सरकारले जलवायु परिवर्तन, डिजिटलाइजेशन, ई–गभर्नेन्स, र विकास सहकार्यजस्ता क्षेत्रमा नेपाललाई सहयोग गर्दै आएको उल्लेख गरे । तर उनले नेपाल र फिनल्याण्डबीच व्यापार र आर्थिक गतिविधिहरू थप विस्तार गर्ने ठूलो सम्भावना रहेकोमा जोड दिए ।

राजदूत र सहकार्य प्रमुखलाई स्वागत गर्दै एनजीसीसीआईका अध्यक्ष सन्तोष चन्द्र कुँवर ले बताए कि एनजीसीसीआईनेपालको पुरानो द्विपक्षीय चेम्बर हो, जसको स्थापना ३५ वर्ष अघि भएको हो, र यसले नेपाल र फिनल्याण्डबीचको व्यापार तथा आर्थिक सम्बन्ध प्रवर्द्धनमा महत्वपूर्ण भूमिका खेल्न सक्छ । उनले फिनल्याण्ड युरोपेली संघभित्र महत्वपूर्ण र सम्भावनाशील देश भएको र नेपाल फिनल्याण्डसँग आफ्नो व्यापार सम्बन्ध मजबुत बनाउन इच्छुक रहेको बताए ।

अध्यक्ष कुँवरले थप उल्लेख गरे कि हालको व्यापार सन्तुलन फिनल्याण्डको पक्षमा भए पनि द्विपक्षीय व्यापार मात्रा बढाउने पर्याप्त सम्भावना छ, जसबाट दुवै देशलाई लाभ हुनेछ । उनले जानकारी दिए कि नेपाल फिनल्याण्डमा हस्तकला, ऊनी कार्पेट, रेडीमेड गार्मेन्ट्स, ऊनी सामान, काठ र बाँसका उत्पादनहरू निर्यात गर्छ। त्यसको बदला नेपालले फिनल्याण्डबाट टेलिकम्युनिकेशन उपकरण, मेसिनरी पार्ट्स, औद्योगिक कच्चा पदार्थ, मल र इलेक्ट्रिकल सामानहरू आयात गर्छ ।

अध्यक्ष कुँवरले फिनल्याण्ड नेपालका लागि युरोपेली बजारमा प्रवेश गर्ने सम्भावित साझेदार र प्रवेशद्वारको रूपमा कार्य गर्नसक्ने पनि बताए । यस सन्दर्भमा, एनजीसीसीआईले युरोपमा नेपाली उत्पादन प्रवर्द्धन गर्न जर्मनीमा ट्रेडिङ हब स्थापना गर्ने प्रयास सुरु गर्ने योजना बनाएको छ ।

बैठकमा एनजीसीसीआईका उपाध्यक्ष तथा अन्य कार्यकारी समिति सदस्यहरूले फिनल्याण्ड सरकारसँग सहकार्य गर्दै व्यापार प्रवर्द्धनका उपायहरूबारे आफ्ना विचारहरू साझा गरे । बैठकमा एनजीसीसीआईका सल्लाहकार डा. गोपाल प्रसाद तिवारी ले नेपाल–जर्मनी व्यापार र आर्थिक सम्बन्धको वर्तमान स्थिति प्रस्तुत गर्दै युरोपेली संघका देशहरूमा, विशेष गरी फिनल्याण्डमा, नेपालको बजार उपस्थितिलाई विस्तार गर्ने अवसरहरूको चर्चा गरे । उनले निर्यात प्रवर्द्धनका लागि प्रभावकारी सुविधा र व्यापारमा अवरोध नहुने सुनिश्चितता आवश्यक भएकोमा जोड दिए ।

व्यवसायीहरूले पनि बैठकमा फिनल्याण्डले नेपालको निजी क्षेत्र विकासमा थप समर्थन गर्न सक्ने अपेक्षा व्यक्त गरे । फिनल्याण्ड दूतावासकी विकास सहयोग प्रमुख सारा एलानेन ले व्यापार र आर्थिक सहकार्य सुदृढ बनाउन आफ्नो चासो व्यक्त गर्दै, डिजिटलाइजेशन र जलवायु परिवर्तनका पहलहरूमा फिनल्याण्डको विकास सहयोगबारे जानकारी गरिन् ।

बैठकमा एनजीसीसीआईका उपाध्यक्ष उत्तम भट्टराई, महासचिव एलेक्ज लल मुक्तान, को(कोषाध्यक्ष गोपाल दास मानन्धर, कोषाध्यक्ष शुभशिष थापलिया, कार्यकारी सदस्यहरू अवदेश के। दास, राजिब मंगल जोशी, र बिधाता श्रेष्ठ पनि उपस्थित थिए र नेपाली निर्यात र युरोपेली पर्यटक आगमन प्रवर्द्धन गरी साझा समृद्धिका लागि आफ्ना विचारहरू व्यक्त गरे ।