एजेन्सी । चीनका राष्ट्रपति सी चिनपिङले भ्रष्टाचार र दुराचारको आरोपमा धेरै वरिष्ठ कमान्डरहरू बर्खास्त भएपछि सैन्य क्षेत्रभित्रको भ्रष्टाचार विरुद्धको अभियानलाई निरन्तरता दिने प्रतिबद्धता जनाएका छन् ।
राष्ट्रपतिले शनिबार पिपुल्स लिबरेसन आर्मी र पिपुल्स आर्म्ड पुलिसका प्रतिनिधिहरूका सामु आफ्नो भाषणको क्रममा सबै भ्रष्टको सफाया गर्ने चेतावनी दिएका हुन् ।
‘पार्टीप्रति वफादार नहुनेहरूका लागि सेनामा कुनै ठाउँ हुनुहुँदैन, न त भ्रष्ट तत्त्वहरूका लागि नै कुनै ठाउँ हुनुपर्छ,’ सीले भने ।
उनले यसै महिनाको अन्त्यमा स्वीकृत हुन लागेको देशको आगामी पञ्चवर्षीय योजनाका क्रममा कोषको प्रवाह, शक्तिको प्रयोग र गुणस्तर नियन्त्रण जस्ता मुख्य क्षेत्रहरूमा कडा निगरानी राख्न आह्वान गरे ।
सन् २०२३ मा आफ्नो तेस्रो कार्यकाल सुरक्षित गरेपछि सीले सशस्त्र बल र चिनियाँ कम्युनिस्ट पार्टीको पोलिटब्युरोमा भ्रष्टाचार विरुद्धको कारबाही सुरु गरेका थिए । यस अभियानका कारण केन्द्रीय सैन्य आयोगका धेरै सदस्य र दर्जनौं जनरलहरू बर्खास्त भएका छन् । सन् २०२३ मा चिनियाँ कम्युनिस्ट पार्टीले दुई पूर्व रक्षामन्त्रीहरूलाई निष्काशन गरेको थियो ।
यस वर्षको सुरुमा चिनियाँ अधिकारीहरूले अनुशासन र कानूनको गम्भीर उल्लंघनको आशंकामा सीएमसीका उपाध्यक्ष चाङ युक्सिया विरुद्ध भ्रष्टाचारविरोधी अनुसन्धान सुरु गरेका थिए । पश्चिमी सञ्चारमाध्यमहरूले चाङमाथि चीनको आणविक कार्यक्रमसम्बन्धी जानकारी अमेरिकालाई चुहाएको आरोप लागेको हुन सक्ने संकेत गरेका थिए ।
अमेरिकाको गुप्तचर निकाय सीआईएले हालै सूचनादाताहरू भर्ती गर्ने प्रयासलाई तीव्र पारेको छ र सैन्य प्रविधिको संवेदनशील जानकारीमा पहुँच भएका सेवा सदस्यहरूलाई लक्षित गर्दै चिनियाँ भाषामा विज्ञापनहरू जारी गरेको छ ।
चीनको विदेश मन्त्रालयले ती विज्ञापनहरूको निन्दा गर्दै चीनविरोधी विदेशी शक्तिहरूको घुसपैठ र विध्वंसात्मक गतिविधिहरूको सामना गर्ने प्रतिबद्धता जनाएको छ ।
प्रतिक्रिया