बैतडीमा जन्ती बोकेको बस दुर्घटनामा परी १३ जनाको निधन

काठमाडौं । बैतडीमा जन्ती बोकेको बस दुर्घटना हुँदा १३ जनाको मृत्यु भएको छ भने ४५ जना घाइते भएका छन्।

जिल्ला प्रहरी कार्यालय बैतडीकाअनुसार उपचारका लागि डडेलधुरा अस्पताल पठाइएका थप ५ जनाको निधन भएपछि मृतकको संख्या १३ पुगेको हो।

गम्भिर घाइते ३ जनालाई धनगढी रेफर गरिएको छ। अन्य २७ जना घाइतेको उपचार भइरहेको छ।

बिहीबार बेलुका पुर्चौडी नगरपालिका–७ बडगाउँ मोडमा पवनदुत यातायातको सुपप्र ०२००१ ख १११९ नम्बरको बस दुर्घटनामा हुँदा ६ जनाको घटनास्थलमै र २ जनाको उपचारको क्रममा मृत्यु भएको हो।

दुर्घटनामा बझाङको बित्थडचिर गाउँपालिका–७ का ४० वर्षीय केशवराज जोशी, १३ वर्षीय अशोकराज जोशी, ३५ वर्षीय बसन्त जोशी, केदारस्युँ गाउँपालिकाका ६० वर्षीय मोहनदेव भट्ट, जयपृथ्वी नगरपालिका–७ का ४० वर्षीय बसन्तराज रतला र बैतडीको पुर्चौडी नगरपालिका–७ का ४० वर्षीय पुष्पा अवस्थीको घटनास्थलमै मृत्यु भएको प्रहरीले जनाएको छ।

यस्तै, बित्थडचिर गाउँपालिका–७ का ४१ वर्षीय विष्णुदत्त जोशी र ४२ वर्षीय नरेशराज जोशीको उपचारको क्रममा मृत्यु भएको प्रहरीले जनाएको छ।

डडेलधुरा अस्पतालमा उपचारको क्रममा राति थप ५ जनाको मृत्यु भएको प्रहरीले जनाएको छ। डडेलधुरा अस्पतालमा मृत्यु हुनेको नाम भने खुल्न बाँकी छ।

बस सडकबाट २ सय मटिर तल खसेको छ। दुर्घटनापछि बस चालक बिरेन्द्र बुढालाई प्रहरी नियन्त्रणमा लिएको छ।