थाइल्यान्ड : गुडिरहेको यात्रुवाहक रेलमा क्रेन खस्दा २२ जनाको मृत्यु

एजेन्सी । थाइल्यान्डमा निर्माणाधीन उच्च गतिको रेलमार्गमा एउटा क्रेन बुधबार यात्रुवाहक रेलमाथि खस्दा रेल पटरीबाट बाहिरिएपछि कम्तीमा २२ जनाको मृत्यु भएको स्थानीय अधिकारीहरूले बताएका छन् ।

‘२२ जनाको मृत्यु भएको छ र ३० भन्दा बढी घाइते भएका छन्,’ नाखोन रत्चासिमा प्रान्तका स्थानीय प्रहरी प्रमुख थात्चापोन चिन्नावाङले एएफपी समाचार संस्थालाई बताए ।

उक्त दुर्घटना बुधबार बिहान बैंककबाट २३० किलोमिटर उत्तरपूर्वमा पर्ने नाखोन रत्चासिमा प्रान्तको सिखियो जिल्लामा उबोन रत्चाथानी प्रान्ततर्फ जाँदै गरेको रेलमा भएको हो ।

आगो निभाइएको र अहिले उद्धारकार्य जारी रहेको प्रहरीले जनाएको छ ।

स्थानीय सञ्चारमाध्यमले प्रसारण गरेको प्रत्यक्ष फुटेजमा भग्नावशेषबाट धूवाँ निस्किरहेको र एउटा उज्यालो रंगको रेल पटरीबाट बाहिरिएर पल्टिएको अवस्थामा उद्धारकर्मीहरू घटनास्थलतर्फ दौडिरहेको देखिएको थियो ।

नाखोन रत्चासिमा प्रान्तीय विभागले उक्त रेल बैंककबाट उबोन रत्चाथानी प्रान्ततर्फ गइरहेको बताएको छ ।

यातायातमन्त्री फिफात रत्चाकितप्राकानले रेलमा १९५ जना सवार रहेको र अधिकारीहरू मृतकको पहिचान गर्न लागिपरेको बताए ।

उक्त क्रेन थाइल्यान्डमा ५.४ अर्ब डलरको लागतमा निर्माण भइरहेको उच्च गतिको रेल सञ्जाल परियोजनामा प्रयोग भइरहेको थियो । बेइजिङको समर्थन रहेको यस परियोजनाले चीनको विशाल बेल्ट एन्ड रोड पूर्वाधार पहलको हिस्साको रूपमा सन् २०२८ सम्ममा लाओस हुँदै बैंककलाई चीनको कुनमिङसँग जोड्ने लक्ष्य राखेको छ ।

थाइल्यान्डमा औद्योगिक र निर्माण स्थलमा हुने दुर्घटनाहरू लामो समयदेखि सामान्य बन्दै आएका छन् । त्यहाँ सुरक्षा नियमहरूको फितलो कार्यान्वयनले गर्दा प्रायः घातक घटनाहरू हुने गर्छन् ।