प्रचण्डले जितेको गोरखा-२ बाट एमालेले गर्‍यो चक्रे मिलनलाई उम्मेदवार सिफारिस

काठमाडौं । आगामी निर्वाचनका लागि गुन्डा डन चक्रे मिलनको नाम उम्मेदवारमा सिफारिस भएको छ ।

नेकपा एमाले गोरखा क्षेत्र नम्बर २ को क्षेत्रीय कमिटीले आगामी प्रतिनिधि सभा निर्वाचनका लागि उम्मेदवारका रूपमा मिलन गुरुङ (चक्रे मिलन) को नाम सिफारिस गरेको छ ।

विगतमा ‘गुण्डा नाइके’ को पहिचान बनाएका गुरुङलाई युवाहरूको माग र दबाब भन्दै एमालेले प्रत्यक्षतर्फको उम्मेदवारका लागि सिफारिस गरेको हो।

सिफारिसमा परेका गुरुङको छवि विवादित छ । प्रहरीको क्रिमिनल रेकर्ड सिस्टम (सीआरएस) अनुसार उनीविरुद्ध अहिलेसम्म १२ पटकभन्दा बढी मुद्दा चलेका छन्। उनी पछिल्लो पटक गत साउनमा सार्वजनिक स्थानमा आतंक मच्चाएको र बाटो अवरुद्ध गरेको आरोपमा काठमाडौंको महाराजगञ्जबाट पक्राउ परेका थिए । ज्यान मार्ने उद्योग लगायतका मुद्दा खेपेका उनी पटक–पटक हिरासत र जेल बस्दै आएका पात्र हुन् ।

एमालेका अनुसार गुरुङ २०५० सालदेखि नै पार्टीमा सक्रिय रहँदै आएका छन्। उनले आफ्नो पाखुरामा एमालेको चुनाव चिह्न ‘सूर्य’ को ट्याटु समेत खोपेका छन् । यसअघिको निर्वाचनमा पनि उम्मेदवार बन्ने चर्चा चले पनि अन्तिममा उनले टिकट पाएका थिएनन् ।

आफूमाथि लाग्दै आएको ‘गुण्डा’ को आरोपबारे गुरुङले असन्तुष्टि व्यक्त गरेका छन्। उनले आफू लामो समयदेखि निस्वार्थ समाजसेवामा सक्रिय रहेको र ‘गुण्डा’ को आरोप लगाएर दुःख दिने प्रयास भइरहेको बताएका छन् । उम्मेदवारी आफ्नो व्यक्तिगत इच्छाभन्दा पनि स्थानीय समुदाय र विशेषगरी ‘जेनजी’ पुस्ताको निरन्तर मागका कारण भएको उनको दाबी छ।

डा. बाबुराम भट्टराईको चुनावी क्षेत्र मानिने गोरखा–२ बाट २०७९ को निर्वाचनमा माओवादी केन्द्रका अध्यक्ष पुष्पकमल दाहाल ‘प्रचण्ड’ निर्वाचित भएका थिए।