बर्दिया । बर्दियाको सदरमुकाम गुलरिया र बारबर्दिया नगरपालिका जोड्ने बबई नदीको जब्दिघाट पुल भत्किएको आठ वर्षसम्म पनि निर्माण नहुँदा सर्बसाधारणले जोखिम मोलेर नदी तर्न बाध्य भएका छन्।
पप्पु कन्ट्रक्सनले बनाएको पुल पहिलोपटक २०७४ साउन २८ गते भासिएकोमा ०७८ असोजमा आएको बाढीले बिच भागबाटै भत्काएको थियो। बाढीले बिच भागको स्पान बगाउँदा सदरमुकाम गुलरिया आउजाउ गर्ने मोटर बाटो बन्द भएको छ।
पप्पु कन्ट्रक्सनले १६ करोड ६८ लाख ४ हजार रुपैयाँ लगानीमा निर्माण गरेको पुल उद्घाटन नहुँदै भासिएपछि बबई नदी वारपार गर्न यहाँका नागरिकलाई डुंगाको सहारा लिन परेको छ।
स्थानीय माघु थारु चौधरीका अनुसार पुल बगाउँदा बिरामी, बालबालिका र जेष्ठ नागरिक सबैभन्दा बढी मारमा परेका छन्।
‘पुलको बाटो पूर्ण रुपमा बन्द छ, स्टिमरसम्म पुग्नका लागि पनि बालुवाको बाटो भएर २०-२५ मिनेट हिड्नु पर्छ’, उनले भने।
पुल नभएपछि जब्दीघाटमा स्टिमर संचालनमा छ। स्टिमरमार्फत नदी पार गरेबापत एक जनाले १० रुपैयाँ शुल्क बुझाउनु पर्छ। साइकलको १० र मोटरसाइकलको १५ रुपैयाँ बुझाउन बाध्य छन्।
स्टिमर संचालनका लागि गुलरिया र बारबर्दिया नगरपालिकाले ठेक्का दिएका छन्। ठेकेदारले खसी, बोका पार गरेबापत समेत शुल्क लिने गरेको छ। खसी, बोकाको १० रुपैयाँ शुल्क बुझाउन सर्वसाधारण बाध्य छन्।
यो घाटबाट दैनिक कम्तीमा दुई हजार सर्वसाधारण आउजाउ गर्छन्। पुल पुनस्र्निर्माण नहुँदा सदरमुकाम गुलरिया आउन सर्वसाधारणले सास्ती खेप्नु परेको छ। पुल भएको बेला १५ मिनेटमा गुलरिया पुगे पनि डुंगामार्फत नदी तर्दा झण्डै एक घण्टा लाग्ने गरेको छ।
भत्किएको पुल कहिले निर्माण हुने हो निश्चित छैन । पप्पु कन्ट्रक्सनले डिजाइन अनुसार पुल निर्माण नगर्दा सो पुल भासिएको हो। सडक विभाग अन्तर्गत पुल निर्माण शाखाले गरेको प्राविधिक अध्ययन अनुसार पुल निर्माणमा निर्माण कम्पनीले गम्भीर लापरबाही गरेको देखिएको छ।
पुल्चोक इन्जिनियरिङ क्याम्पस अन्तर्गत इन्स्टिच्युट अफ इन्जिनियरिङ्ग कन्सल्टेन्सी सर्भिसेजको प्रतिबेदन अनुसार जमीनमुनि १६ मिटरसम्म पाइल राख्नु पर्नेमा ५ मीटरसम्म मात्र राखिएको भेटिएको प्रतिबेदन उल्लेख गरिएको छ।
जसका कारण पुलको भारवाहन क्षमता निकै कमजोर देखिएको हो।
पप्पु कन्ट्रक्सनलले ०६८ असार २५ बाट पुल निर्माणको काम सुरु गरेको थियो। तोकिएको भन्दा डेढ वर्ष ढिलो निमार्ण भएको पुलको लम्बाई ४ सय ३५ मिटर रहेको छ। निर्माणपछि पुल हस्तान्तरण नहुँदै भासिएपछि सडक डिभिजन कार्यालय नेपालगन्जले २०७९ मंसिरमा पप्पुसँगको ठेक्का सम्झौता तोडेको छ।
बबई नदीमा पर्ने जब्दिघाट खोला पुल मर्मत नहुँदा जनतालाई सास्ती भएको भन्दै बर्दियाबाट निर्वाचित नेपाली कांग्रेसका तत्कालीन सांसद सञ्जय गौतम २०८० वैशाख ३० बाट रिले अनसन बसेका थिए।
सांसद गौतम अनसन बसेको चार दिनपछि जेठ ३ मा भौतिक, पूर्वाधार तथा यातायातमन्त्री प्रकाश ज्वालाले पत्रकार सम्मेलन गरी सोही स्थानमा १० दिनभित्र नयाँ पुल निर्माणका लागि ठेक्का आह्वान गर्ने घोषण गरेका थिए।
ठेक्का आह्वानको घोषणा मात्रै गरेनन्, सांसद गौतमलाई अनसन तोड्न पनि पत्रकार सम्मेलनमार्फत मन्त्री ज्वालाले आग्रह गरे। मन्त्रीको कुरा विश्वास गरेर सांसद गौतमले अनसन पनि तोडे। तर, दुई बर्ष बितिसक्दा पनि ठेक्का आह्वान भएको छैन।
प्रतिक्रिया